1 milion euro donacion dhe tri ndeshje, zbulohet marrëveshja e veçantë e Federatës gjermane me Red Bullin

Federata Gjermane e Futbollit (DFB) ka konfirmuar një marrëveshje të pazakontë me Red Bull për të siguruar lirimin e Jurgen Kloppit nga detyrimet e tij, në mënyrë që ai të merrte drejtimin e kombëtares së Gjermanisë.

Marrëveshja përfshin një donacion prej 1 milion eurosh për bamirësi dhe angazhimin për të zhvilluar tre ndeshje të ardhshme të kombëtares në Leipzig.

Tashmë është zbuluar se deri ku shkoi DFB për ta siguruar Kloppin.

Gjatë prezantimit të tij zyrtar të premten, presidenti i federatës, Bernd Neuendorf, bëri të ditur se DFB pranoi të dhuronte 1 milion euro për fondacionin “Wings for Life”, të mbështetur nga Red Bull, si pjesë e marrëveshjes për lirimin e trajnerit nga angazhimet e tij të mëparshme.

Neuendorf shpjegoi se ky gjest ishte një shenjë mirënjohjeje për mënyrën se si Red Bull e menaxhoi procesin e lirimit të Kloppit.

“Federata Gjermane e Futbollit bëri këto marrëveshje të veçanta si vlerësim për faktin se lirimi u realizua në një mënyrë shumë të thjeshtë dhe pa burokraci,” deklaroi ai.

Donacioni nuk ishte elementi i vetëm i marrëveshjes. Si pjesë e akordit me Red Bullin, DFB u zotua gjithashtu të zhvillojë tre ndeshje të kombëtares së Gjermanisë në Red Bull Arena në Leipzig gjatë periudhës së kontratës së Kloppit.

Ky ishte një kompromis konkret që siguroi se stadiumi në pronësi të Red Bullit dhe tifozët vendas do të përfitonin drejtpërdrejt nga marrëveshja që çoi në largimin e njërit prej drejtuesve më të rëndësishëm të kompanisë.

Emërimi i Kloppit konsiderohet si një sukses i madh për DFB-në, e cila synon ta rikthejë futbollin gjerman në majën e futbollit ndërkombëtar.

Hans-Joachim Watzke, nënkryetari i parë i DFB-së dhe një bashkëpunëtor i vjetër i Kloppit që nga koha te Borussia Dortmund, e bëri të qartë lehtësimin e tij që situata më në fund u zgjidh.

Për ta liruar Kloppin nga posti i drejtorit global të futbollit te Red Bull, u zhvilluan negociata intensive në nivelet më të larta mes DFB-së dhe drejtuesve të kompanisë.

Neuendorf zbuloi se kishte zhvilluar “bisedime shumë intensive me RB, veçanërisht me Oliver Mintzlaff”, drejtorin ekzekutiv të kompanisë, për të arritur një marrëveshje të pranueshme për të dyja palët.

Duke reflektuar mbi këto negociata, presidenti i DFB-së vlerësoi profesionalizmin e treguar nga drejtuesit e Red Bullit.

“Jam shumë mirënjohës ndaj Oliver Mintzlaff për bisedimet dhe mënyrën se si i zhvilluam ato. Të dy e kuptuam shpejt se ushtrimi njëkohësisht i rolit të Jurgenit te RB dhe detyrës së trajnerit të kombëtares do të ishte shumë i vështirë për t’u pajtuar,” përfundoi Neuendorf./