Prof. Ejup Sulejmani – njeriu që formoi breza, arkitekti i heshtur i futbollit tetovar

Ka emra që maten me trofe, por ka edhe emra që maten me brezat që kanë krijuar. Një prej tyre është pa dyshim Prof. Ejup Sulejmani, një figurë që jetën e ka lidhur ngushtë me futbollin, fillimisht si futbollist dhe më pas si edukator, trajner dhe formues i talenteve të rinj informon Tetovasot.

Për dekada me radhë, ai ka qenë pjesë e pandashme e rrugëtimit të futbollit tetovar, veçanërisht në Akademinë e Shkëndijës, aty ku janë hedhur themelet e shumë karrierave të suksesshme. Breza të tërë futbollistësh kanë kaluar nëpër duart e tij, duke mësuar jo vetëm si të luajnë futboll, por edhe si të ndërtohen si sportistë dhe njerëz.

Shumë prej emrave që sot kanë lënë gjurmë me fanellën e KF Shkëndija apo në klube të tjera brenda dhe jashtë vendit, dikur ishin fëmijë në stërvitjet e Prof. Ejup Sulejmanit. Ai ishte aty kur ata hodhën hapat e parë, duke u bërë një nga figurat më të rëndësishme në zhvillimin e futbollit të ri shqiptar në Maqedoninë e Veriut.

Në një kohë kur shumëkush kërkon famën e momentit, Prof. Sulejmani zgjodhi punën e heshtur, atë që nuk shihet në titujt e mëdhenj, por që lë gjurmë të përhershme. Ai nuk ndërtoi vetëm futbollistë, por ndërtoi ëndrra, karaktere dhe besim te qindra të rinj.

Sot, kur flitet për sukseset e futbollit tetovar dhe për brezat që kanë mbajtur lart emrin e Shkëndijës, është e pamundur të mos përmendet edhe emri i Prof. Ejup Sulejmanit, njeriut që për një jetë të tërë i shërbeu futbollit me përkushtim, profesionalizëm dhe dashuri të pakushtëzuar.Tetovasot