Me organizimin e aktivitetit “Të ëndërrojmë së bashku” Fakulteti Pedagogjik e shënoi 1 Qershorin – Ditën Ndërkombëtare të Fëmijëve

Me rastin e 1 Qershorit – Ditës Ndërkombëtare të Fëmijëve, Fakulteti Pedagogjik i Universitetit të Tetovës e organizoi aktivitetin edukativo-artistik “Të ëndërrojmë së bashku”, duke mirëpritur nxënës të klasave të pesta nga shkollat fillore të Komunës së Tetovës. Aktiviteti krijoi një hapësirë frymëzuese ku fëmijët shprehën kreativitetin e tyre, zhvilluan aftësitë bashkëpunuese dhe përjetuan vlerat e edukimit përmes lojës, artit dhe komunikimit.
Programi u hap me fjalën përshëndetëse të dekanit të Fakultetit Pedagogjik, Prof. Dr. Lulzim Mehmedi, i cili theksoi se Dita Ndërkombëtare e Fëmijëve është një kujtesë e rëndësishme se fëmijët janë pasuria më e çmuar e shoqërisë sonë. Ai nënvizoi se investimi në edukimin, mirëqenien dhe zhvillimin e tyre përfaqëson investim të drejtpërdrejtë në të ardhmen e vendit. Sipas tij, aktivitetet e organizuara në këtë ditë promovojnë vlera thelbësore si miqësia, respekti, kreativiteti dhe puna ekipore – vlera që ndërtojnë bazat e zhvillimit të çdo individi dhe të shoqërisë në tërësi.
Dekani theksoi gjithashtu se Fakulteti Pedagogjik mbetet i përkushtuar në përgatitjen e mësuesve dhe edukatorëve të ardhshëm, të cilët do të udhëheqin brezat e rinj drejt dijes, vlerave njerëzore dhe qytetarisë aktive.
Pjesa qendrore e programit ishte gara kreative “Të ndërtojmë kullën më të lartë”, ku nxënësit punuan në grupe dhe dëshmuan se suksesi nuk matet vetëm me rezultatin përfundimtar, por edhe me procesin e bashkëpunimit, komunikimit, respektit dhe mbështetjes reciproke. Përmes kësaj veprimtarie, fëmijët zhvilluan aftësi të rëndësishme sociale dhe organizative, duke mësuar vlerën e punës në ekip.
Atmosfera u pasurua më tej me një pjesë skenike të realizuar nga studentët e Fakultetit Pedagogjik, të cilët sollën mesazhe edukative dhe argëtuese për pjesëmarrësit.
Të pranishmit patën gjithashtu mundësinë të dëgjojnë artistin Bahar Nesimi, i cili foli për rëndësinë e dramës në zhvillimin e fëmijëve. Ai theksoi se aktivitetet dramatike ndihmojnë në shprehjen e emocioneve, zhvillimin e kreativitetit dhe imagjinatës, si dhe në forcimin e vetëbesimit dhe aftësive komunikuese të fëmijëve.
Një nga momentet më të veçanta të aktivitetit ishte “Muri i dëshirave”, ku fëmijët, përmes vizatimeve dhe mesazheve të tyre, shprehën ëndrrat, shpresat dhe vizionet për një botë më të mirë. Ky kënd simbolik u shndërrua në një hapësirë frymëzimi, duke sjellë në qendër zërin dhe imagjinatën e fëmijëve.
Në vazhdim, pjesëmarrësve iu drejtua me një fjalë përshëndetëse prodekania për arsim, Prof. Dr. Besa Havziu Ismaili, e cila theksoi rëndësinë e dëgjimit të fëmijëve, mbështetjes së tyre të vazhdueshme dhe besimit në potencialin unik që secili prej tyre bart. Ajo vuri në pah se krijimi i mundësive për zhvillimin e plotë të fëmijëve është përgjegjësi e përbashkët e institucioneve arsimore, familjes dhe shoqërisë.
Atmosfera festive u kurorëzua me një program artistik baleti të realizuar nga klubi i baletit “Tutu”, i cili solli emocion, elegancë dhe gëzim për të gjithë të pranishmit.
Në përmbyllje të aktivitetit, u ndanë mirënjohje për shkollat pjesëmarrëse, bashkëpunëtorët dhe të gjithë kontribuuesit që mundësuan realizimin e kësaj dite të veçantë kushtuar fëmijëve.
Përmes organizimeve të tilla, Fakulteti Pedagogjik vazhdon të dëshmojë përkushtimin e tij në promovimin e vlerave për fëmijët, edukimit cilësor dhe krijimin e mundësive që çdo fëmijë të ëndërrojë, të krijojë dhe të zhvillohet në mënyrë të plotë, duke ndërtuar kështu një të ardhme më të mirë për të gjithë.