Italia ndalon koncertet e Kanye West dhe Travis Scott për shkak të shqetësimeve të sigurisë

Autoritetet italiane kanë ndaluar mbajtjen e koncerteve të Kanye West dhe Travis Scott, duke përmendur shqetësime që lidhen me rendin publik dhe sigurinë.

Prefekti Salvatore Angieri njoftoi të premten se dy ngjarjet, të planifikuara për t’u mbajtur në korrik në qytetin verior të Reggio Emilia-s, nuk do të zhvillohen, pas një kërkese nga komuniteti hebre lokal për anulimin e koncertit të West, raporton BBC.

Drejtuesja e komunitetit, Nicoletta Uzzielli, u kishte bërë thirrje autoriteteve lokale që koncerti të zëvendësohej me një performancë që do ta rikthente “muzikën në qendër si një forcë universalisht bashkuese”.

West ka shkaktuar zemërim të madh për shkak të një sërë deklaratash antisemite, raciste dhe pro-naziste, të cilat së fundmi çuan edhe në ndalimin e hyrjes së tij në Mbretërinë e Bashkuar.

Reperi amerikan, i cili tashmë njihet me emrin Ye, ishte planifikuar të performonte së bashku me Scott dhe artistë të tjerë, përfshirë The Chainsmokers, Rita Ora dhe Swedish House Mafia.

Prefektura rajonale deklaroi se në vendim kanë ndikuar disa faktorë, përfshirë “anulimin e koncerteve të mëparshme të reperit amerikan në vende të tjera dhe rrezikun real të kundërprotestave”.

Po ashtu, u theksua se afërsia kohore e dy ngjarjeve, të planifikuara për më 17 dhe 18 korrik në RFC Arena të Reggio Emilia-s, si dhe numri i madh i pjesëmarrësve të pritshëm, kanë qenë faktorë shtesë në marrjen e këtij vendimi.

Scott u përball me kritika të ashpra pasi 10 persona, të moshës nga 9 deri në 27 vjeç, humbën jetën gjatë festivalit të tij Astroworld në Houston të Teksasit në vitin 2021.

Mijëra të tjerë u plagosën kur shpërtheu paniku dhe turma, që kishte tejkaluar kapacitetin e lejuar, u shty drejt skenës gjatë performancës kryesore të reperit amerikan.

Ndërkohë, festivali Wireless në Londër, i planifikuar për këtë verë, u anulua muajin e kaluar pasi West, i cili ishte shpallur si artisti kryesor, nuk mori leje për të hyrë në Mbretërinë e Bashkuar për shkak të reagimeve ndaj deklaratave të tij të mëparshme.

Në vitin 2022, West publikoi në rrjetet sociale se do të kalonte në “death con 3 ndaj hebrenjve”, ndërsa në maj të vitit të kaluar publikoi një këngë me titull “Heil Hitler” dhe shiti bluza me simbole të svastikës naziste.

Ndalimi i hyrjes së tij në Mbretërinë e Bashkuar çoi në anulime të tjera të aktiviteteve të tij.

Më 15 prill, West njoftoi se koncerti i planifikuar në Marseille ishte shtyrë “deri në një njoftim të dytë”. Mediat franceze raportuan në atë kohë se ministri i Brendshëm, Laurent Nuñez, po shqyrtonte mundësinë e ndalimit të koncertit të planifikuar për 11 qershor.

Edhe koncerti i tij i 19 qershorit në Silesian Stadium u anulua për “arsye formale dhe ligjore”, njoftoi organizatori në prill.

Reperi ka tentuar të rikthehet në vëmendjen kryesore të publikut pasi kërkoi falje për veprimet e tij në një deklaratë të gjatë të publikuar në gazetën The Wall Street Journal në janar.

“Nuk jam nazist dhe as antisemit,” shkroi ai. “I dua njerëzit hebrenj.”