Irani hedh poshtë ultimatumin e Trumpit: “Çdo urë do të rrafshohet me tokën, çdo central elektrik do të shkatërrohet!”
Irani dhe Izraeli po shkëmbejnë sulme, ndërsa Teherani ka refuzuar të rihapë Ngushticën e Hormuzit dhe të pranojë një marrëveshje për armëpushim përpara afatit të vendosur nga Presidenti amerikan Donald Trump. Sipas Reuters, Trump ka paralajmëruar se Irani duhet të pranojë kërkesat e tij ose do të përballet me “shkatërrim”.
Irani hodhi poshtë propozimin amerikan të ndërmjetësuar nga Pakistani për një armëpushim të menjëhershëm dhe heqjen e bllokadës efektive të ngushticës, i cili do të pasohej nga bisedime për një zgjidhje paqësore brenda 15 deri në 20 ditësh. Përgjigjja e Iranit përbëhej nga dhjetë pika, duke përfshirë fundin e konfliktit në rajon, një protokoll për kalim të sigurt në Hormuz, heqjen e sanksioneve dhe rindërtimin, raportoi agjencia zyrtare IRNA.
Të hënën, Trump deklaroi se “i gjithë vendi mund të shkatërrohet brenda një nate, dhe ajo natë mund të jetë nata e nesërme”. Ai u kërcënua se do të godasë centralet elektrike dhe infrastrukturën nëse Teherani nuk respekton afatin. Pa një marrëveshje, Trump tha se “çdo urë në Iran do të shkatërrohet” deri në mesnatën e të mërkurës (sipas kohës lindore) dhe se “çdo central elektrik do të digjet, do të shpërthejë dhe nuk do të përdoret më kurrë”.
Herët të martën, ushtria izraelite njoftoi se ka kryer një valë sulmesh ajrore kundër infrastrukturës qeveritare në Teheran dhe zona të tjera, ndërsa ka përdorur sistemet mbrojtëse për të interceptuar raketat e lëshuara nga Irani.
Ndërkohë, Arabia Saudite ka interceptuar raketa balistike mbi rajonin e saj lindor. Ky shtet ka qenë objektiv i qindra raketave dhe dronëve iranianë që nga fillimi i luftës më 28 shkurt. Arabia Saudite, Emiratet e Bashkuara Arabe dhe Bahrejni lëshuan paralajmërime të njëkohshme për sigurinë publike këtë të martë.
Trump i hodhi poshtë pyetjet nëse shkatërrimi i centraleve elektrike përbën krim lufte, duke thënë se “nuk është fare i shqetësuar” për këtë mundësi. Nga ana tjetër, përfaqësuesi i Iranit në OKB e quajti kërcënimin e Trumpit si “nxitje të drejtpërdrejtë të terrorizmit”.
Si kundërpërgjigje, zëvendësministri i Sportit i Iranit, Alireza Rahimi, u bëri thirrje artistëve dhe sportistëve të formojnë “zinxhirë njerëzorë” rreth centraleve elektrike, ndërsa agjencia “Mehr” raportoi se një sinagogë në qendër të Teheranit është dëmtuar rëndë nga një raketë amerikano-izraelite.
Go+ Energy Drink
