Bllokada e Hormuzit trondit tregjet globale/ Nafta ‘ngjitet’ në 115 dollarë për fuçi

Çmimet e naftës kanë shënuar rritje të fortë pas raportimeve se Shtetet e Bashkuara po përgatiten për një bllokadë të zgjatur ndaj Iranit.

Nafta e papërpunuar ka arritur rreth 115 dollarë për fuçi, pas një rritjeje të mëparshme në rreth 110 dollarë.

Sipas mediave ndërkombëtare, kjo lëvizje e tregjeve lidhet me shqetësimet për përshkallëzimin e tensioneve mes SHBA-së dhe Iranit.

Sipas raportimeve, Uashingtoni po shqyrton masa të reja që synojnë kufizimin e porteve iraniane dhe presionin ekonomik ndaj Teheranit.

Në përgjigje, Irani ka paralajmëruar se do të vazhdojë të ndikojë në lëvizjen detare në Ngushticën e Hormuzit, një nga pikat më të rëndësishme për transportin global të naftës.

Ngushtica mbetet e tensionuar, pasi përmes saj kalon një pjesë e madhe e furnizimit botëror me naftë dhe gaz. Konflikti i zgjatur ka bërë që kalimi detar të funksionojë me kufizime dhe ndërprerje të herëpashershme.