Trump: Kam rënë dakord të flas me udhëheqjen e re të Iranit

Presidenti i SHBA-së, Donald Trump tha të dielën se kishte rënë dakord të zhvillonte bisedime me udhëheqjen e re të Iranit, edhe pse sulmet SHBA-Izrael ndaj vendit vazhdojnë, transmeton Anadolu.

“Ata duan të flasin dhe unë kam rënë dakord të flas”, tha Trump për The Atlantic.

Më vonë ai i tha NBC-së se zyrtarët iranianë “po flasin” me SHBA-në, pa dhënë asnjë detaj.

Kur u pyet se cili do të ishte rezultati i operacionit, Trump tha se kishte “shumë rezultate që janë të mira”, përfshirë “prerjen e kokës së tyre”, duke iu referuar udhëheqjes iraniane. Ai tha se arsyeja pse nisi sulmet ishte e drejtpërdrejtë: “Irani nuk ishte i gatshëm të ndalonte kërkimin e tij bërthamor ose të zotohej të mos zhvillonte armë bërthamore”.

Lidhur me faktin nëse do t’i ndalte sulmet mes bisedimeve në vazhdim, Trump nuk e përjashtoi ndalimin e sulmeve ndaj Iranit mes bisedimeve në vazhdim. Ai tha se do ta merrte në konsideratë “nëse ata mund të na kënaqin”, por se deri më tani, “ata nuk kanë qenë në gjendje ta bëjnë këtë”.

Në një intervistë të veçantë, ai i tha “Fox News” se 48 udhëheqës iranianë ishin eliminuar “me një të shtënë”, duke thënë “askush nuk mund ta besojë suksesin që kemi”. Ai shtoi se SHBA-ja e dinte se sa objektiva kishin mbetur dhe se operacionet po lëviznin “me shpejtësi”.

Lidhur me viktimat, Trump i tha NBC News: “Ne presim viktima me diçka të tillë. Kemi tre, por presim viktima, por në fund, do të jetë një marrëveshje e madhe për botën”.

Lidhur me shqetësimet lidhur me çmimet e naftës dhe ndërprerjet e mundshme në Ngushticën e Hormuzit, një korridor kritik global i transportit detar, ai ishte shpërfillës. “Nuk jam i shqetësuar për asgjë. Unë thjesht bëj atë që është e drejtë. Në fund, gjithçka funksionon”, tha Trump.

Komentet erdhën ndërsa sulmi ndaj Iranit hyri në ditën e dytë. Operacioni i përbashkët SHBA-Izrael, i nisur të shtunën, ka vrarë disa zyrtarë të lartë iranianë, përfshirë udhëheqësin suprem Ajatollah Ali Khamenei.

Teherani është hakmarrë me sulme me dronë dhe raketa që synojnë vendet e Gjirit. Tre ushtarë amerikanë janë vrarë dhe pesë të tjerë janë plagosur rëndë që nga fillimi i operacioneve, tha Komanda Qendrore e SHBA-së.