Tragjedi ajrore në Kolumbi: Rrëzohet avioni ushtarak, të paktën 66 të vdekur

Një avion i Forcave Ajrore Kolumbiane është rrëzuar pak çaste pas ngritjes në jug të vendit, duke shkaktuar vdekjen e të paktën 66 personave dhe plagosjen e dhjetëra të tjerëve, konfirmuan autoritetet zyrtare.
​Shefi i aviacionit ushtarak, Carlos Fernando Silva Rueda, bëri me dije se në bord të avionit ndodheshin 115 ushtarë, 11 anëtarë të ekuipazhit dhe dy punonjës policie.

​Avioni i transportit i tipit “Hercules C-130″, prodhim amerikan, u rrëzua pranë qytetit Puerto Leguizamo. Shkaqet e këtij aksidenti tragjik janë ende nën hetim.
​”Avioni pësoi një aksident tragjik gjatë ngritjes nga Puerto Leguizamo, teksa transportonte ushtarë të forcave tona të sigurisë,” deklaroi Ministri i Mbrojtjes, Pedro Sanchez.

​Ai shtoi se deri më tani nuk ka shenja që tregojnë se avioni mund të jetë sulmuar nga grupet rebele që operojnë në atë zonë.

​Burime ushtarake njoftuan se në mesin e të vdekurve janë konfirmuar 58 ushtarë, ndërsa katër të tjerë rezultojnë të zhdukur. Erich Saumeth, ekspert kolumbian i aviacionit dhe analist ushtarak, bëri me dije se avioni i rrëzuar ishte një donacion i SHBA-së i bërë në vitin 2020.