Shkëndija reagon ashpër: “Mjaft me padrejtësitë, kampionati po vendoset në tavolinë – Do të njoftojmë UEFA-n”

Klubi Futbollistik Shkëndija ka lëshuar një komunikatë zyrtare shpërthyese pas ndeshjeve të xhiros së 22-të në Ligën e Parë Futbollistike të Maqedonisë së Veriut (LPFMV), duke akuzuar drejtpërdrejt arbitrat dhe Federatën për favorizim të qëllimshëm të rivalëve dhe dëmtim të integritetit të garës.

​Fundi i durimit: “Heshtja u interpretua si dobësi”
Nga tabori kuqezi thonë se kanë pritur gjatë që institucionet të reflektojnë, por ndodhitë në ndeshjet Shkëndija-Brera dhe Sileksi-Vardari kanë qenë “kufiri i fundit”. Sipas klubit, vendimet skandaloze të arbitrave po favorizojnë në mënyrë të përsëritur KF Vardar, duke krijuar një perceptim të rrezikshëm për administrimin e ligës nga ana e FFM-së.
​Investimet private në rrezik
Në reagimin e tyre, Shkëndija rikujton se klubi mbahet nga investime private dhe sakrifica e pronarëve, e jo nga paratë e shtetit apo komunës.
“Investimet në KF Shkëndija janë mundi dhe sakrifica jonë për të ndërtuar një klub serioz që përfaqëson denjësisht vendin në garat ndërkombëtare. Nëse kjo qasje e pabarabartë vazhdon, ne do të jemi të detyruar të vëmë seriozisht në pikëpyetje vazhdimin e investimeve tona në këtë ambient,” thuhet në komunikatë.
​UEFA do të informohet për “pazaret” në tavolinë
Klubi tetovar ka paralajmëruar se nuk do të ndalet me kaq. Ata do të informojnë zyrtarisht institucionet ndërkombëtare, përfshirë UEFA-n, për rrjedhën e kampionatit vendas. Mesazhi i tyre është i qartë: Shkëndija nuk kërkon favorizim, por kushte të barabarta.
​”Futbolli duhet të vendoset në fushë, jo në tavolinë. Shkëndija nuk kërkon asgjë më shumë se kaq!” – përfundon reagimi i klubit.