Real Madridi rrit interesimin për Konaten

Real Madridi është në kërkim të një mbrojtësi të ri qendror, pasi synon të forcojë repartin defensiv gjatë afatit kalimtar të verës.

Ideja e klubit madrilen është të sjellë një përforcim të nivelit të lartë, duke pasur parasysh largimet e mundshme të David Alaba dhe Antonio Rudiger. Një nga emrat që po shqyrtohet është Ibrahima Konate.

Interesimi për Konate ekziston që nga vera e kaluar, edhe pse në nëntor dukej se kishte marrë fund, kur madrilenët i kishin bërë të ditur zyrtarisht mbrojtësit të Liverpoolit se nuk do të vazhdonin përpjekjet për transferimin e tij.

Megjithatë, situata ka ndryshuar në javët e fundit, pasi Real Madridi humbi mundësinë për të transferuar Marc Guehi, i cili iu bashkua Manchester Cityn në janar, si dhe Dayot Upamecano, që rinovoi kontratën me Bayern Munichun.

Së fundmi është përmendur edhe emri i Nico Schlotterbeck, por sipas raportimeve të BILD (përmes Anfield Sector), Konate është kandidati kryesor i Real Madridit për pozicionin e mbrojtësit qendror. Edhe gazetari Matteo Moretto ka theksuar se interesimi nga “Bernabéu” vazhdon të jetë aktiv.

Konate shihet si një opsion më tërheqës sesa Schlotterbeck, pasi mund të transferohet si lojtar i lirë, ndërsa mbrojtësi i Borussia Dortmund do të kërkonte një shumë të konsiderueshme transferimi, duke qenë se kontrata e tij skadon në vitin 2027. Për më tepër, francezi mund të jetë një zëvendësim ideal për një lojtar si Rudiger, mungesa e të cilit gjatë këtij sezoni mund të ndikojë që klubi të mos i ofrojë rinovim para se kontrata aktuale të përfundojë në qershor.

Një lëvizje e Real Madridit për Konate do të kishte shumë kuptim. Edhe pse ai ka pasur një sezon të vështirë me Liverpoolin, cilësitë e tij janë shfaqur në shumë raste, sidomos gjatë sezonit 2024-25. Fakti që mund të transferohet pa pagesë e bën atë një opsion edhe më tërheqës, megjithatë mbetet për t’u parë nëse në javët e ardhshme madrilenët do të bëjnë një ofertë paraprake për kontratë.