Mbrojtja: Aktakuza për Teatrin dhe Bibliotekën në Tetovë bie në ujë

Nën akuzën keqpërdorim të procedurave të furnizimeve publike, keqpërdorim të pozitës zyrtare dhe punë të pandërgjegjshme në shërbim, në Gjykatën Themelore të Tetovës u mbajt seanca e radhës gjyqësore për Teatrin dhe Bibliotekën e Tetovës. Për veprën në fjalë akuzohen katër persona Haki Fazliu ish drejtor, Artan Arsllani përgjegjës i komisionit për furnizime, Bajram Muça inxhinier dhe Sejdi Shasivari pronar i kompanisë UPC që kryen punimet në objekt. Ata ngarkohen për shpërdorim të mbi 11 milion eurove.

Në seancën e sotme morën pjesë dy ekspertë të jashtëm, Dushanka Popova, inxhiniere dhe Jane Damjanski ekspert ekonomik. Në dëshminë e tyre ata thanë se gjatë ndërtimit të objektit nuk ka pasur shtim të sasisë së punimeve mbi atë që është e lejuar ligjërisht, dhe se nuk ka pasur ndryshime të pozicioneve. Sipas tyre ka pasur vetëm ndryshime të vëllimit të punës, gjatë kryerjes së punimeve, në cilësinë e punimeve të paparashikuara, por që gjithnjë sipas tyre, nuk kanë ndikuar në ndryshimin e çmimit.

Seanca e sotme ka përfunduar vetëm me dëgjimin dhe marrjen në pyetje të dy ekspertëve të lartpërmendur, dhe sipas gjykatësit të lëndës, e tillë do të jetë edhe seanca e radhës ku para trupit gjykues mbrojtësve dhe prokurorit, pritet të paraqiten ekspertë të tjerë.

Edhe sot, në seancë nuk u paraqitën përfaqësuesit e Ministrisë së Kulturës Seanca e radhës u caktua për në 20 prill në ora 10:00./Alsat.mk.