Zaev mohon lidhjen me rastin e kanabisit, paralajmëron padi ndaj VMRO-DPMNE-së

Ish-kryeministri i Maqedonisë, Zoran Zaev, ka reaguar përmes rrjeteve sociale duke mohuar pretendimet për lidhjen e tij me sekuestrimin e sasive të mëdha të kanabisit mjekësor në disa fabrika të vendit. “Publikisht kërkoj falje nga deputeti Petrushevski dhe nga partia VMRO-DPMNE për të gjitha ato gënjeshtra, shpifje dhe fyerje, përfshirë edhe keqpërdorimin e qëllimshëm të emrit tim në atë dramë të inskenuar rreth konfiskimit të dhjetëra tonëve kanabis mjekësor, për shkak të ruajtjes dhe magazinimit të supozuar të papërshtatshëm”, shkroi Zaev.

Ai i cilësoi si “gënjeshtra të pacipa” pretendimet se ka qenë i përfshirë në rastet e kanabisit apo se ka telefonuar në Drejtorinë e Doganave. Zaev shtoi se prej pesë vitesh përballet me fyerje të përditshme, por gjithmonë ka respektuar lirinë e fjalës dhe nuk ka kërkuar hakmarrje.

Ish-kryeministri mohoi gjithashtu akuzat e tjera që i janë adresuar, si ndërtimi i kullave në Dubai, presioni për blerjen e spitalit të dr. Zhann Mitrev apo ndërhyrjet në sistemin e drejtësisë. “Tani është mjaft”, theksoi ai.

Zaev paralajmëroi se nëse nuk ka kërkim falje brenda afatit ligjor, do të padisë deputetin Brane Petrushevski dhe partinë VMRO-DPMNE. “Do të luftoj me të gjitha mjetet ligjore për të hequr këtë njollë nga emri im”, shkroi ai.