Selektori i Nigerisë: Dua të bëhem trajneri i parë afrikan i Real Madridit
Selektori i kombëtares së Nigerisë po ëndërron shumë lart.
Éric Chelle, në një intervistë për “RMC Sport”, pranoi ambicien e tij më të madhe profesionale: Real Madrid.
“Dua të jem trajneri i parë afrikan i Real Madrid,” deklaroi ai.
Chelle, 48 vjeç, drejton “Super Eagles” që nga dhjetori i kaluar.
Testi i tij i parë i madh ishte në Kupën e Kombeve të Afrikës, të cilin e kaloi me sukses, duke siguruar vendin e tretë me një skuadër që sapo kishte përjetuar goditjen e rëndë të dështimit për t’u kualifikuar në Kupën e Botës.
Vetëm Maroku, në penallti, arriti të ndalonte rrugëtimin mbresëlënës të Nigerisë në këtë turne kontinental.
Përveç Nigerisë, Chelle më parë ka drejtuar kombëtaren e Malit, vendlindjen e tij.
Ai mbajti këtë pozicion midis viteve 2022 dhe 2024, duke i çuar ata deri në çerekfinale të Kupës së Kombeve të Afrikës 2023.
Gjatë atij turneu, ai pati edhe një moment viral kur, pas eliminimit, pothuajse u shemb dhe një nga ndihmësit e tij u ul pranë tij për të hedhur ujë mbi qafë.
“Po rrezikoja të fikesha. Gjatë përgatitjes për turneun, kisha fibrilacion atrial. Zemra më rrihte 200 herë në minutë gjithë kohën,” rrëfeu ai.
Në futbollin e klubeve, ai ka përvojë të gjerë në divizionet e ulëta të Francës.
Klubi i tij i fundit, para se të vinte në Nigeri, ishte MC Oran në Algjeri, ku qëndroi vetëm katër muaj, deri sa mori thirrjen nga Federata Nigeriane.