Ristoska: Pres që Gjykata Kushtetuese të hapë lëndë për ndryshimet në Kodin Penal

Pres që Gjykata Kushtetuese të hapë një lëndë për ndryshimet në Kodin Penal, me të cilat amnistohen më tej funksionarët, veçanërisht në pjesën që lidhet me prokurimet publike, deklaroi në emisionin 24 Analiza në TV24 prokurorja dhe kandidate për prokurore publike të shtetit, Lençe Ristoska. Ajo i dërgoi mesazh kryetarit të Gjykatës Kushtetuese se pret një procedurë të tillë.

“Në një debat të përbashkët, kryetari i Gjykatës Kushtetuese ma sqaroi se në raste të tilla Gjykata Kushtetuese nuk e vlerëson vetëm kushtetutshmërinë formale, pra procedurën me të cilën është miratuar ligji, por edhe kushtetutshmërinë materiale, respektivisht nëse me ndryshimet gjendja është përmirësuar realisht apo nëse të gjitha vërejtjet që kanë ekzistuar më parë vazhdojnë të mbeten”, tha Ristoska.

Ajo vlerëson se më problematike janë keqpërdorimet në prokurimet publike.

“Fillimisht, për ndryshimet në Kodin Penal të vitit 2023 mund të them se për mua ishte e pabesueshme me çfarë lehtësie u votuan ndryshime të tilla, të cilat promovuan korrupsion dhe mosndëshkueshmëri të hapur. Dhe tani, kur opinioni është sensibilizuar për këtë çështje, kur zhvillohet debat publik dhe së paku pritet të rikthehet zgjidhja e mëparshme, miratohet një zgjidhje ligjore që nuk është ajo që pritej dhe as nuk është e përmirësuar në kuptim pozitiv. Vërejtjet e mia më të mëdha për këtë zgjidhje ligjore lidhen me keqpërdorimet në prokurimet publike.

Rikthehet paragrafi 5 i nenit 353, por këtë herë kufizohet vetëm në dy faza të prokurimit publik. Faza e parë është rasti kur organi ka qenë i obliguar të zbatojë një prokurim publik dhe nuk e ka bërë këtë – raste të tilla pothuajse nuk ekzistojnë. Faza e dytë është tejkalimi i shumës së përcaktuar përmes rritjes së vlerës së prokurimit publik; kjo ka qenë praktikë në të kaluarën, por gjithnjë e më shumë po çrrënjoset.

Mbeten të paadresuara përshtatjet e tenderëve sipas të cilave doni që një kompani e caktuar ta fitojë tenderin, tenderët e ‘vizatuar’, favorizimi i kompanive, lidhja e kontratave për prokurime publike për të cilat nuk ka nevojë reale, tolerimi i paligjshmërive gjatë prokurimeve publike. Tani, duke qenë se këto nuk janë të përfshira shprehimisht, për mua hapet pyetja se çfarë qëndrimi do të mbajë komuniteti juridik: a do të konsiderohet e gjithë kjo që nuk është e përfshirë si e dekriminalizuar, apo do të shkohet sërish sipas paragrafit të parë, si herën e kaluar në vitin 2023, me një kualifikim më të butë”, deklaroi Ristoska.