Ali Ahmeti në Prishtinë: Lufta e UÇK-së e pastër si loti. Të lirohen bashkëluftëtarët tanë që po mbahen padrejtësisht në Hagë

Kryetari i Bashkimi Demokratik për Integrim (BDI), Ali Ahmeti, mori pjesë sot në protestën e mbajtur në Prishtinë në mbështetje të ish-drejtuesve të Ushtria Çlirimtare e Kosovës (UÇK), të cilët po gjykohen në Dhomat e Specializuara të Kosovës në Hagë.

Gjatë fjalës së tij para protestuesve, Ahmeti deklaroi se “lufta për liri dhe pavarësi ka qenë e pastër dhe ka pasur vetëm një ideal – çlirimin e vendit nga okupatori serb”. Ai theksoi besimin e tij në pafajësinë e ish-krerëve të UÇK-së dhe shprehu shpresën që procesi gjyqësor të përfundojë sa më shpejt, me triumfin e drejtësisë, njofton TS.

Protesta u organizua në mbështetje të ish-udhëheqësve të UÇK-së, përfshirë Hashim Thaçi, Kadri Veseli, Jakup Krasniqi dhe Rexhep Selimi, të cilët ndodhen në paraburgim në Hagë nën akuza për krime lufte dhe krime kundër njerëzimit.

Organizatorët e protestës bënë thirrje për një proces të drejtë dhe të paanshëm, ndërsa pjesëmarrësit mbajtën pankarta dhe shprehën mbështetjen e tyre për ish-komandantët.

Procesi ndaj ish-krerëve të UÇK-së po zhvillohet në Hagë dhe mbetet një nga çështjet më të ndjeshme politike dhe juridike në Kosovë dhe më gjerë./TS