Nga përmbytja masive në Durrës te situata problematike në Gjirokastër! Çfarë dimë deri tani për pasojat e motit në vend?

Reshjet e shiut në vend vijojnë edhe këtë të mërkurë ndërsa problematike paraqitet situata në Gjirokastër, Durrës dhe Lezhë. Qyteti i Durrësit dhe Lezhës të martën u “pushtuan” nga sasi e madhe uji pas reshjeve të dendura të shiut.

Zona të ndryshme në qytet u kthyen në lumenj duke vështirësuar qarkullimin dhe duke bllokuar banorët në banesat e tyre. Problematike mbetet situata bë zona e ish-kënetës dhe Shkozës në Durrës. 18 familje janë evakuuar si pasojë e përmbytjeve.

Në Lezhë dhe Kurbin reshjet e shiut gjatë natës kanë rënë me intensitet më të ulët duke sjellë që uji të tërhiqet në pjesën më të madhe të zonave urbane. Niveli i prurjeve në lumenjtë Drin dhe Gjadër mësohet së ka rënë. Deri tani janë evakuuar rreth 8 familje në Kurbin.

Këtë të mërkurë, lumi Vjosa ka dalë nga shtrati në zonën e pazarit, pranë Ura e Mifolit. Sipas të dhënave të fundit, niveli i Vjosës ka arritur në 6.8 metra mbi nivelin e detit.

Prurjet vijojnë të mbeten të larta nga zonat e Gjirokastrës dhe Përmetit, çka po ndikon drejtpërdrejt në rritjen e mëtejshme të nivelit të lumit.