Mickoski: Projektet që i nisëm gjatë 18 muajve të fundit po marrin formën e tyre (FOTO/VIDEO)

ryeministri Hristijan Mickoski deklaroi se një pjesë e madhe e projekteve të nisura gjatë 18–19 muajve të fundit tashmë po konkretizohen, duke theksuar se investimet në arsim, shëndetësi dhe infrastrukturë po japin rezultate të dukshme, përcjell TS.

Gjatë pjesëmarrjes në hapjen e shkollës së rinovuar “Bllazhe Koneski” në Komunën e Aerodromit, Mickoski u shpreh se ndjen kënaqësi dhe emocion kur sheh projekte të tilla, veçanërisht kur bëhet fjalë për kushte më të mira për fëmijët. Ai përmendi se viti i kaluar u mbyll me rinovimin e Klinikës së Gjinekologjisë dhe Obstetrikës, ndërsa viti i ri nisi me hapjen e katër kopshteve të reja në Koçan, Karbincë, Sopishte dhe Gjevgjeli.

Sipas tij, pas kthimit nga udhëtimi zyrtar në Davos, do të vihet në funksion edhe gjimnazi i rinovuar “Kirill Pejçinoviq” në Tetovë. Kryeministri shtoi se krahas objekteve arsimore, janë realizuar edhe projekte të rëndësishme infrastrukturore, përfshirë salla sportive, bulevarde, rrugë ekspres, hekurudhë dhe segmente autostradash.

Mickoski theksoi se këto projekte janë pjesë e premtimeve të dhëna para qytetarëve dhe se Qeveria do të vazhdojë t’i realizojë ato në përputhje me prioritetet dhe mundësitë. Ai falënderoi kryetarin e Komunës së Aerodromit, institucionet përkatëse, punonjësit e shkollës, si dhe prindërit dhe nxënësit për durimin e treguar.

Në fund, kryeministri u uroi nxënësve ditë të gëzuara shkollore dhe sukses në arsimim, ndërsa stafit arsimor punë të mbarë në përcjelljen e dijes te gjeneratat e reja./TS/