Kasami përkujton Masakrën e Reçakut: Plagë e hapur në historinë kombëtare

Tetovë, 15 janar 2026 – Kryetari i Komunës së Tetovës, Bilall Kasami, ka përkujtuar sot Masakrën e Reçakut, një nga ngjarjet më të rënda dhe më tragjike në historinë e shqiptarëve informon Tetovasot.

Në një status të publikuar në rrjetet sociale, Kasami thekson se Reçaku mbetet një plagë e hapur në ndërgjegjen kombëtare dhe një dëshmi e krimeve të kryera ndaj popullit shqiptar.

“Në përvjetorin e Masakrës së Reçakut, kujtojmë një nga plagët më të rënda në historinë tonë kombëtare. Nderim për 45 shqiptarët e pafajshëm dhe përkushtim që e vërteta të mos harrohet kurrë”, ka shkruar Kasami.

Masakra e Reçakut, e ndodhur më 15 janar 1999, tronditi opinionin ndërkombëtar dhe u bë një nga momentet kyçe që sollën ndërhyrjen ndërkombëtare në Kosovë. Përkujtimi i saj, sipas Kasamit, është detyrim moral për të ruajtur kujtesën historike dhe për të mos lejuar që krimet ndaj civilëve të mbeten pa drejtësi.TS