7 gjëra që duhet t’i dini për sulmin në Venezuelë, që raportohet se urdhëroi Presidenti Trump

The Guardian, përmbledh në disa pika zhvillimet që po ndodhin aktualisht në Venezuelë dhe çka i parapriu atyre:

• Shpërthime, zhurma të forta dhe fluturime të ulëta avionësh janë dëgjuar në kryeqytetin e Venezuelës, Karakas, në orët e hershme të së shtunës, mes raportimeve se Donald Trump kishte urdhëruar sulmin.

• Në orët e para të së shtunës, presidenti i Kolumbisë fqinje, Gustavo Petro, pretendoi në rrjete sociale se Venezuela kishte rënë nën sulm. “Për momentin po bombardohet Karakasi… po bombardohet me raketa,” shkroi Petro në platformën X, duke kërkuar një seancë urgjente të Këshillit të Sigurimit të OKB-së.

• Në një deklaratë, qeveria e Venezuelës konfirmoi se Karakasi kishte qenë nën sulm, si dhe tri shtete të tjera: Miranda, La Guaira dhe Aragua.

• Venezuela ka hedhur poshtë atë që e ka quajtur “agresion ushtarak” nga SHBA-ja, thuhet në deklaratën e qeverisë së presidentit Nicolás Maduro, e publikuar herët të shtunën.

• Venezuela ka akuzuar SHBA-në se po përpiqet të “marrë kontrollin” e burimeve të vendit, veçanërisht të naftës dhe mineraleve. Vendi i ka bërë thirrje komunitetit ndërkombëtar të dënojë atë që e ka cilësuar si një shkelje flagrante të së drejtës ndërkombëtare, e cila ka vënë në rrezik miliona jetë.

• Presidenti venezuelian Nicolás Maduro ka “urdhëruar zbatimin e të gjitha planeve të mbrojtjes kombëtare” dhe ka shpallur “gjendje të shqetësimit të jashtëm”, sipas një deklarate të së shtunës.

• Shpërthimet vijnë pas një fushate pesëmujore presioni nga SHBA-ja kundër Maduros, të cilën shumë analistë besojnë se synon rrëzimin e udhëheqësit venezuelian. Që nga gushti, Donald Trump ka urdhëruar një grumbullim të madh ushtarak në brigjet veriore të Venezuelës dhe ka kryer një sërë sulmesh ajrore vdekjeprurëse ndaj të ashtuquajturave “anije narkotike”. Shtëpia e Bardhë dhe Pentagoni nuk kanë reaguar menjëherë ndaj kërkesave për koment të shtunën në mëngjes.