Ukrainasit nisin kundërsulmin në qytetin kyç të luftës

Ukrainasit nisin kundërsulmin në qytetin kyç të luftës

Pjesëtarët e shërbimit të inteligjencës mbrojtëse të Ukrainës po zhvillojnë një operacion kundërofensiv pranë qytetit Pokrovsk, me qëllim rivendosjen e funksionimit të linjave kryesore logjistike, raportojnë media ukrainase UNN dhe korrespondenti i The Economist, Oliver Carroll.

“Rezultoi se shërbimi ushtarak i inteligjencës së Ukrainës po zhvillon një kundërofensivë të guximshme pranë Pokrovskut për të rivendosur linjat kyçe logjistike. Videot që kam shpërndarë thuhet se tregojnë uljen e helikopterëve në zona që Rusia pretendon se i kontrollon”, raportoi Carroll.

Korrespondenti publikoi një video ku shihet ulja e një helikopteri UH-60 Black Hawk në një fushë dhe zbritja e ushtarëve prej tij, pas së cilës helikopteri largohet.

Planifikonin sulm terrorist gjatë fundjavës së Halloween-it, disa të arrestuar në Michigan

Burime të UNN konfirmuan informacionin për kundërofensivën, si dhe autenticitetin e videos së publikuar nga Carroll.

Presidenti ukrainas, Volodymyr Zelensky deklaroi se situata në Pokrovsk është e vështirë, por se forcat ukrainase e kontrollojnë atë.

Ai hodhi poshtë informacionet për rrethimin e trupave ukrainase, duke i krahasuar ato me gënjeshtra të ngjashme që janë përhapur rreth operacionit në Kursk.

Pokrovsku, që para luftës kishte rreth 60 mijë banorë, ndodhet në një rrugë të rëndësishme që lidh disa qytete që formojnë harkun e fundit të madh mbrojtës në pjesën ukrainase të rajonit të Donetskut.

Rënia e Pokrovskut do ta afronte Rusinë me realizimin e objektivit të saj afatgjatë — pushtimin e plotë të kësaj zone. /Telegrafi/