Tre persona kërcënuan kryetarin e komunës, prokuroria ngre aktakuzë

Prokuroria Themelore Publike e Kavadarit ka ngritur aktakuzë ndaj tre personave për kanosje të drejtuara ndaj kryetarit të komunës, Mitko Jançev, dhe familjes së tij. Siç informon prokuroria, rasti trajtohet për veprën penale kërcënim ndaj sigurisë, sipas nenit 144 të Kodit Penal, ndërsa për të akuzuarin e parë kërkohet edhe masë paraburgimi, njofton TS.

I akuzuari i parë, i cili ka shtetësi maqedonase dhe bullgare, ngarkohet gjithashtu me veprën përhapje të materialit racist dhe ksenofobik përmes sistemit kompjuterik, sipas nenit 394-g. Ai për një periudhë të gjatë në profilin e tij në Facebook ka publikuar përmbajtje me gjuhë urrejtjeje, fyerje, thirrje për dhunë dhe kërcënime të drejtpërdrejta ndaj kryetarit Jançev. Ka publikuar edhe fotografi të Jançevit dhe fëmijëve të tij të mitur, ndërsa kërcënimet i ka shoqëruar me video ku shihet duke qëlluar me pushkë automatike dhe me pistoletë.

Sipas prokurorisë, nga korriku i këtij viti ai ka filluar të kontaktojë me kryetarin edhe përmes telefonit, duke dërguar kërcënime personalisht dhe përmes mesazheve.