Shpërthime në Kiev: Sulm i madh rus me dronë dhe raketa, lë pas të plagosur dhe dëme të mëdha

Rusia ka kryer një sulm të madh ndaj Kievit me dronë dhe raketa, duke shkaktuar zjarre pothuajse në të gjitha distriktet e qytetit, tha kryetari i bashkisë, Vitali Kliçko. Të paktën 11 persona janë plagosur, mes tyre një në gjendje të rëndë, shtoi ai.

Zyrtarët njoftuan se mbetjet e dronëve dhe zjarret kanë dëmtuar ndërtesa të larta banimi, një shkollë, një institucion mjekësor dhe godina administrative. Kliçko deklaroi gjithashtu se është dëmtuar sistemi i ngrohjes së qytetit, duke paralajmëruar se mund të ketë ndërprerje në furnizimin me energji elektrike dhe ujë.

“Rusët goditën ndërtesa banimi. Ka shumë objekte të dëmtuara, pothuajse në të gjitha distriktet,” tha kreu i administratës ushtarake të Kievit, Timur Tkaçenko.

Forcat Ajrore të Ukrainës njoftuan se sulme ajrore ka pasur edhe në rajone të tjera të vendit.