“Po udhëtonte drejt Bosnjës, atje e ka furrën”, detaje të reja nga arrestimi i shtetasit të Kosovës në Serbi

Ish-ushtari i UÇK-së Avni Qenaj, është arrestuar ditën e martë në Serbi. I njëjti ishte pjesë e Brigadës 138 “Agim Ramadani” në Koshare.

Qenaj, aktualisht ndodhet në paraburgim me masë ndalimi 48-orësh, ndërsa ndaj tij pritet të dorëzohet një kallëzim penal në prokurorinë kompetente.

Lidhur me arrestimin, në Klan Kosova, ka folur kryetari i Organizatës së Veteranëve të Luftës së UÇK-së, Hysni Gucati.

Ai tha se informacionet e vetme që posedon, është se Avni Qenaj po udhëtonte drejt Bosnje e Hercegovinës, pasi sipas Gucatit, ai në Bosnje kishte furrën.

“Unë i kam marr të gjitha informacionet në Has, sepse Avnia është nga Hasi i Prizrenit. Me sa kam kuptuar, ai është arrestuar në kufirin me Serbinë, teksa po udhëtonte për në Bosnje. Ai furrën e ka në Bosnje”.

“Ai ka udhëtuar disa vite andej, dhe kjo është për herë të parë që i ka ndodhur një gjë e tillë, dhe mua më vjen keq. Ne kemi bërë thirrje edhe përmes emisionit tuaj, edhe mediave tjera, të mos shkojnë nëpër Serbi veteranët e Ushtrisë Çlirimtare të Kosovës, sepse po kanë probleme”, tha Gucati.

Ministria e Punëve të Jashtme dhe Diasporës të martën ka konfirmuar arrestimin e shtetasit të Kosovës, Avni Qenaj, nga autoritetet e Serbisë.

MPJD ka bërë me dije se është dërguar tashmë notë verbale te misionet diplomatike të vendeve të Quint-it të akredituara në Serbi, teksa i ka bërë thirrje Bashkësisë Ndërkombëtare që të rrisë vigjilencën dhe presionin ndaj autoriteteve të Serbisë.

Në njoftim thuhet se Zyra Ndërlidhëse e Republikës së Kosovës në Serbi do të procedojë me paraqitjen e kërkesës zyrtare për lejimin e vizitës të personit të arrestuar, sapo të konfirmohet lokacioni i saktë ku ai po mbahet.