Ndeshja me Anglinë në “Air Albania”, FSHF-ja njofton për masat që do të vendosin për ditën e ndeshjes

Më 16 nëntor, Shqipëria e përmbyllë kampanjën kualifikuese për Kampionatin Botëror, me një ndeshje të madhe.

“Kuqezinjtë” do t’i bëjnë konak Anglisë në stadiumin “Air Albania”

Pak para kësaj ndeshje, Federata Shqiptare e Futbollit ka njoftuar për masat që do të ndërmerren për këtë ndeshje, në bashkëpunim me Policinë e Shtetit në Shqipëri.

FSHF njofton se do të vendosë tabela orientuese jashtë stadiumit në ditën e ndeshjes. Po ashtu, në njoftimin e FSHF-së thuhet se mbledhja e monedhave të zëna në kontrollet jashtë stadiumit do të bëhet nga Kryqi i Kuq.

“Në ditën e ndeshjes, stafi i stadiumit “Air Albania” do të vendosë tabela orientuese në perimetrin e jashtëm të stadiumit, për të ndihmuar tifozët të gjejnë më lehtë hyrjen dhe tribunën përkatëse sipas biletës që kanë blerë”, thuhet në njoftimin e FSHF-së.

“Në pikat e hyrjes së stadiumit do të vendosen kosha plastike për grumbullimin e sendeve të ndaluara, të cilat mund të zbulohen gjatë kontrolleve fizike nga strukturat e sigurisë. Gjithashtu, grumbullimi i monedhave dhe sendeve të tjera të vogla do të bëhet nga përfaqësuesit e Kryqit të Kuq”, vazhdohet më tutje.

FSHF vazhdon duke shpjeguar mënyrën e të hyrit në stadium.

“Të gjithë tifozët duhet të jenë të pajisur me biletën përkatëse për hyrjen në stadium.

Nuk do të lejohet futja e fëmijëve pa biletë, pavarësisht moshës, në mënyrë që të shmanget mbipopullimi dhe bllokimi i shkallëve gjatë ndeshjes.

Gjithashtu, tifozët paralajmërohen se biletat e dublikuara ose të falsifikuara nuk do të njihen nga sistemi elektronik i stadiumit, dhe poseduesit e tyre nuk do të lejohen të hyjnë.

Portat e stadiumit do të hapen tre orë përpara fillimit të ndeshjes, ndaj FSHF dhe Policia e Shtetit u bëjnë thirrje tifozëve të mbërrijnë në kohë, të ndjekin udhëzimet e rendit dhe të drejtohen drejt tribunës së përcaktuar në biletën e tyre”, përfundon njoftimi i FSHF-së.

Para ndeshjes me Anglinë, megjithatë, kombëtarja e Shqipërisë do të luajë me Andorrën si mysafire, me datë 13 nëntor.

Momentalisht, Shqipëria është e dyta në grup me 11 pikë, shtatë më pak se Anglia që është e para me 18 pikë. Serbia është e treta me dhjetë pikë.

Pozita e dytë, ku është Shqipëria, të dërgon në play-offin e Kampionatit Botëror.