Izraeli vazhdon të zgjerojë vendbanimet ilegale në Bregun Perëndimor

Izraeli planifikon të pushtojë një pjesë të madhe historike të Bregut Perëndimor, sipas një dokumenti qeveritar, ndërsa kolonët gjatë natës ngritën një vendbanim të ri ilegal, megjithëse vendi po përballet me presion për të frenuar dhunën e kolonëve në territorin palestinez.

Administrata civile e Izraelit ka njoftuar se synon të merr pjesë të mëdha të Sebastisë, vendbanim i rëndësishëm arkeologjik në Bregun Perëndimor.

Peace Now, organizatë që monitoron vendbanimet, tha se kjo pjesë përfshin rreth 450 ari, që përbën marrjen më të madhe nga Izraeli të tokës me rëndësi arkeologjike.

Lëvizja vjen ndërsa kolonët izraelitë festonin krijimin e një vendbanimi të ri, të paautorizuar, pranë Betlehemit, dhe një avokat palestinez tha se një aktivist nga Bregu Perëndimor ishte arrestuar dhe shtruar në spital.

Ndërkohë, Human Rights Watch tha se Izraeli mund të ketë kryer krime lufte kur këtë vit dëboi me forcë 32 mijë palestinezë nga tre kampe refugjatësh në Bregun Perëndimor.

Urdhri izraelit i publikuar më 12 nëntor rendit parcelat e tokës që synon të konfiskojë në zonën e Sebastisë. Peace Now, që ia dha dokumentin AP-së, tha se siti arkeologjik popullor, ku rriten mijëra ullinj, u përket palestinezëve.

Izraeli në vitin 2023 njoftoi planet për ta kthyer atë pjesë në një atraksion turistik. Gërmimet tashmë kanë filluar dhe qeveria ka ndarë më shumë se 9,24 milionë dollarë për zhvillimin e vendbanimit, sipas Peace Now dhe një organizate tjetër për të drejtat e njeriut.

Urdhri u jep palestinezëve 14 ditë kohë për të paraqitur ankesë kundër këtij vendimi.

Pjesa më e madhe e tokës historike që Izraeli kishte marrë më herët kishte një sipërfaqe prej 70 ari në Susya, një fshat në jug të Bregut Perëndimor, thotë Peace Now.