Haradinaj: Shumë persona po marrin pjesë në procesin e votimit në Junik pa qenë banorë, do të padisim secilin

Kryetari i AAK-së, Ramush Haradinaj, ka thënë se shumë persona po marrin pjesë në procesin e votimit në Junik pa qenë banorë të kësaj komune.

Haradinaj iu referua “të dhënave” të tyre dhe të njëjtën ankesë për këtë komunë e kanë pasë edhe në rundin e parë të zgjedhjeve lokale.

“Të dhënat tona nga shtabi në Junik, tregojnë se shumë persona po marrin pjesë në procesin e votimit në Junik pa qenë banorë të kësaj komune. Kujtojmë se një veprim i tillë përbën shkelje të ligjit dhe çdo rast i tillë do t’i përcillet institucioneve përkatëse, përfshirë Prokurorinë, për hetim dhe veprim, ku do të bëjmë padi për secilin person veç e veç”.

Haradinaj ka bërë thirrje që të respektohet rregullat e ligji.

“Ftojmë të gjithë qytetarët që të respektojnë rregullat dhe të kontribuojnë në një proces zgjedhor të drejtë, transparent dhe në përputhje me ligjin”.