Hamasi: Projektligji izraelit për dënimin me vdekje, “përpjekje për legalizimin e vrasjeve masive të palestinezëve”

Grupi palestinez Hamas dënoi të martën një projektligj të Parlamentit izraelit (Knesset) që lejon ekzekutimin e të burgosurve palestinezë si “një përpjekje për të legalizuar vrasjet masive të palestinezëve”, transmeton Anadolu.

Knesseti miratoi të hënën në mbrëmje leximin paraprak të një projektligji të paraqitur nga ministri i Sigurisë Kombëtare i ekstremit të djathtë, Itamar Ben-Gvir, për të ekzekutuar të burgosurit palestinezë “të cilët qëllimisht ose nga pakujdesia shkaktojnë vdekjen e një qytetari izraelit”.

Projektligji u miratua me 39 vota pro dhe 16 kundër në asamblenë me 120 vende, sipas transmetuesit publik të Izraelit, KAN.

Sipas sistemit legjislativ të Izraelit, një projektligj duhet të kalojë tre lexime përpara se të bëhet ligj.

Hamasi e quajti miratimin e projektligjit “një zgjatim të qasjes raciste dhe kriminale të qeverisë sioniste dhe një përpjekje për të legalizuar vrasjen masive të organizuar të popullit tonë palestinez që jeton nën pushtim”.

“Miratimi i këtij legjislacioni fashist dhe sadist në sytë e botës përbën një këmbëngulje në shkeljen e ligjeve dhe konventave ndërkombëtare, kryesisht midis tyre të Ligjit Ndërkombëtar Humanitar dhe parimeve të të drejtave të njeriut”, tha grupi.

Ndër të tjera komunitetit ndërkombëtar dhe organizatave të të drejtave të njeriut u bëhet thirrje që të “dënojnë këtë legjislacion të rrezikshëm racist për pushtim, të vendosin sanksione penguese ndaj entitetit izraelit mashtrues dhe ta ushtrojnë presion mbi të që ta tërheqë ligjin”.

Grupi kërkoi gjithashtu formimin e komiteteve ndërkombëtare hetimore për të dokumentuar kushtet e të burgosurve palestinezë dhe torturat dhe abuzimet që u nënshtrohen në burgjet izraelite.

Më shumë se 10 mijë të burgosur palestinezë, përfshirë fëmijë dhe gra, mbahen në burgjet izraelite, duke vuajtur nga tortura, uria dhe neglizhenca mjekësore, me shumë të vrarë, sipas raporteve të organizatave të të drejtave të njeriut dhe medias palestineze dhe izraelite.

Kur u hap seanca dimërore në Knesset dy javë më parë, Ben-Gvir kërcënoi se nëse ligji nuk do të sillej për votim në seancën e përgjithshme brenda tre javësh, partia e tij nuk do të ishte e detyruar të votojë me koalicionin qeveritar.

Ministri izraelit i ekstremit të djathtë ka bërë thirrje të përsëritura për miratimin e një projektligji që lejon ekzekutimin e të burgosurve palestinezë në burgjet e Tel Avivit.

Ben-Gvir ka theksuar gjithashtu kushtet e vështira të të burgosurve palestinezë në burgjet izraelite, mes abuzimeve në rritje kundër tyre dhe mohimit të të drejtave të tyre.

Ndër masat e rrepta janë pezullimi i vizitave, ulja e pagesave për ushqim dhe kufizimi i aksesit në dushe në burg, sipas organizatave të të drejtave të njeriut.