Google synon të mbajë përdoruesit larg ChatGPT me “AI Mode” në Chrome

Google ka lansuar një përditësim të ri të shfletuesit Chrome, i cili përfshin një buton të ri të quajtur “AI Mode”, i cili shfaqet direkt nën fushën e kërkimit në pajisjet mobile.

Ky opsion është aktualisht në dispozicion për përdoruesit në SHBA në pajisjet iOS dhe Android, ndërsa përhapja globale në deri në 160 vende pritet të realizohet gjatë javëve të ardhshme.

Butoni është vendosur mbi shkurtesat e faqeve më të vizituara, duke mundësuar që përdoruesit të aksesojnë AI Mode menjëherë sapo të hapin një tab të ri. Google synon që përdoruesit të klikojnë në “AI Mode” para se t’i drejtohen shërbimeve konkurrente si ChatGPT ose Perplexity.

AI Mode ofron qasje të shpejtë në kërkimin AI të Google dhe mbështet disa gjuhë. Përdoruesit mund të bëjnë pyetje dhe të marrin përmbledhje, përgjigje dhe rekomandime pa pasur nevojë të hapin shërbime shtesë.

Njëkohësisht, Google ka prezantuar përmirësime në “agentic AI”, të cilat mundësojnë që AI Mode të rezervojë automatikisht bileta për ngjarje ose termine në sallonet lokale të bukurisë.

Megjithatë, konkurrenca nuk qëndron pasive. Perplexity po zhvillon shfletuesin e vet Comet, ndërsa OpenAI po punon në Atlas, një shfletues bazuar në AI që mund të ndryshojë mënyrën se si përdorim internetin.

Përdoruesit e Chrome mund të përditësojnë shfletuesin e tyre – AI Mode duhet të shfaqet automatikisht kur hapin një tab të ri.