Zelensky: Putini më urren, ndiej të njëjtën gjë për të

Presidenti i Ukrainës, Volodymyr Zelensky, foli për mediat pas një takimi të gjatë me presidentin amerikan Donald Trump në Shtëpinë e Bardhë. Takimi, sipas burimeve, zgjati rreth dy orë e gjysmë.

Gjatë konferencës me gazetarët, Zelensky u pyet pse mendon se presidenti rus, Vladimir Putin, po e shmang takimin me të. Ai u përgjigj hapur:

“Nuk është sekret. Siç tha Trump, Putin më urren”, tha Zelensky.

I pyetur më tej nëse ai vetë e urrente Putinin, presidenti ukrainas u përgjigj pa hezitim:

“Putini dëshiron të vrasë të gjithë njerëzit e mi, kështu që është e kuptueshme që ndiej të njëjtën gjë për të.”

Zelensky theksoi se kjo nuk është çështje personale, por një realitet i luftës që po zhvillohet.

by Taboola
“Nuk ka të bëjë me ndjenjat… Rusët na sulmuan dhe ky është armiku… sigurisht që ne e urrejmë armikun”, shtoi ai në gjuhën ukrainase.

Deklaratat e Zelensky-t pasqyrojnë ashpërsinë e konfliktit aktual dhe vijën e ashpër që Kievi mban kundër Moskës, sidomos në kontekstin e ndihmës ndërkombëtare dhe mbështetjes nga Shtetet e Bashkuara.