Shurupi i kollës i merr jetën 17 fëmijëve, arrestohet pronari i kompanisë

Policia indiane ka arrestuar pronarin e kompanisë Sresan Pharma, e cila qëndron pas prodhimit të një shurupi kolle, i cili i ka marrë jetën 17 fëmijëve.

Lajmi u konfirmua nga një oficer i lartë i policisë për agjencinë Reuters.

S.Ranganathan, pronari i kompanisë me seli në shtetin jugor Tamil Nadu, u arrestua të mërkurën në qytetin Chennai dhe pritet të dalë para gjykatës.

Të gjithë fëmijët e prekur ishin nën moshën pesë vjeç dhe ndërruan jetë muajin e kaluar pasi kishin konsumuar shurupin ‘Coldrif’, i cili përmbante nivel të lartë të dietilen glikolit, një substancë toksike që përdoret në industri si tretës, antifriz dhe në produkte të tjera jo farmaceutike. Testet laboratorike treguan se përqendrimi i kësaj substance ishte pothuajse 500 herë mbi kufirin e lejuar.

Pas tragjedisë, shurupi ‘Coldrif’ është ndaluar në disa pjesë të Indisë. Ligji indian kërkon që çdo kompani farmaceutike të testojë jo vetëm lëndët e para, por edhe çdo seri të produktit përfundimtar. Megjithatë, ngjarja ka zbuluar dështime serioze në zbatimin e këtyre rregulloreve.

Pas rasteve të ngjashme në vitin 2023, ku shurupet indiane u lidhën me vdekjen e më shumë se 10 fëmijëve në Gambia, Uzbekistan dhe Kamerun, qeveria indiane vendosi kontrolle shtesë për eksportet e shurupit të kollës.

Edhe Organizata Botërore e Shëndetësisë (OBSH) ka reaguar, duke deklaruar se ky rast i fundit nxjerr në pah një boshllëk të thellë në mbikëqyrjen e barnave të shitura brenda dhe jashtë Indisë. Ajo gjithashtu paralajmëroi se disa nga eksportet mund të jenë realizuar në mënyrë jozyrtare dhe të pakontrolluar.