OKB-ja dënon mizoritë në Darfur, Sudan pas shkeljeve serioze të të drejtave të njeriut dhe qindra vdekjeve

Këshilli i Sigurimit i Kombeve të Bashkuara ka shprehur “shqetësim të thellë” për situatën në kryeqytetin e rajonit Darfur i Veriut në Sudan, pas raporteve për shkelje serioze të të drejtave të njeriut dhe qindra vdekjeve.

Në një deklaratë të lëshuar sot, këshilli, i përbërë nga 15 anëtarë, dënoi sulmin mbi qytetin El Fasher (nga Forcat e Shpejta Mbështetëse (RSF) paramilitare dhe kërkoi ndalimin e menjëhershëm të dhunës.

Ai gjithashtu dënoi “mizoritë e raportuara të kryera nga RSF-ja ndaj popullsisë civile, përfshirë ekzekutimet e menjëhershme dhe arrestimet arbitrare” dhe kërkoi që autorët të mbahen përgjegjës.

Në fjalën e saj para Këshillit të Sigurimit, nënsekretarja e Përgjithshme e OKB-së për Afrikën, Martha Ama Akyaa Pobee, paralajmëroi për një përkeqësim dramatik të mëtejshëm të situatës dhe kritikoi mosveprimin e këshillit deri më tani.

“Raporte dhe paralajmërime për katastrofën që po zhvillohet në El Fasher janë lëshuar për muaj me radhë. Deri më tani, Këshilli i Sigurimit i Kombeve të Bashkuara nuk ka marrë veprime vendimtare për të parandaluar përkeqësimin e situatës” tha ajo.

Ajo u bëri thirrje organeve të OKB-së të “përdorin të gjitha mjetet në dispozicion për të kërkuar paqe në Sudan”. Tani ekziston kërcënimi që lufta të përhapet në shtetin qendror të Kordofanit të Veriut. Pobee tha se rajoni ishte “me gjasë arena e ardhshme e fokusit ushtarak për palët në luftë”.

Takimi i Këshillit të Sigurimit në New York u mbajt më herët se planifikuar për shkak të përshkallëzimit të situatës.

Milicia RSF-së, e cila është përfshirë në një luftë të përgjakshme me ushtrinë e vendit që nga prilli 2023, mori kontrollin e kryeqytetit të Darfurit të Veriut gjatë fundjavës.

Dhjetëra mijëra njerëz u larguan ndërsa qyteti ra dhe dolën raporte për dhunë të gjerë nga ana e milicisë.

Lufta për pushtet midis udhëheqësit de fakto Abdel Fattah al-Burhan dhe ish-zëvendësit të tij, Mohammed Hamdan Daglo, i cili komandonte RSF-në, ka krijuar atë që OKB-ja e ka përshkruar si krizën më të madhe humanitare në botë.