Nazim Taipi takim me fermerët e fshatit Sllatinë: Bujqësia, prioriteti ynë për Tearcën

Kandidati i Aleancës Kombëtare për Integrim (AKI) për Komunën e Tearcës, Nazim Taipi, ka zhvilluar një takim me fermerët e fshatit Sllatinë, ku u diskutua për sfidat dhe nevojat e sektorit bujqësor.

Gjatë takimit u theksua rëndësia e mbështetjes institucionale, qasjes më të lehtë në inpute bujqësore dhe krijimit të kushteve për zhvillimin e qëndrueshëm të bujqësisë në komunë.

Taipi premtoi se në katër vitet e ardhshme, bujqësia do të jetë një ndër prioritetet kryesore të programit të tij, duke garantuar:

Hapjen e një njësie rajonale për bujqësinë në kuadër të komunës;

Mbështetje teknike nga administrata komunale për informimin dhe aplikimin e fermerëve në fondet bujqësore;

Krijimin e shoqatës komunale të bujqve për nxitjen e bashkëpunimit mes tyre.

Sipas tij, këto masa do të ndihmojnë në forcimin e qëndrueshmërisë së fermerëve dhe do të kontribuojnë në zhvillimin ekonomik të komunës.