Shqiptarët e “Severnës” si vasalë të bindur të pushtetit!

Që prej tri dekadash shqiptarët e “Severnës” janë nënshtruar pushtetit maqedon si vasal të bindur, jo që nga viti i kaluar me rikthimin e komitëve në pushtet, por qysh nga fillimet e pluralizmit atëhere kur deputetët shqiptarë ngritën dolli me Presidentin shoven të asaj kohe Kiro Gligorov, me rastin e miratimit te kushtetutës antishqiptare që hoqi nga emërtimin “pakica shqiptare” nga neni kushtetues.

Ndodhën fushatat ndëshkuese policore ndaj shqiptarëve si Bit Pazari, Ladorishti, UT etj., ku shqiptarët servilë në shenjë proteste ndaj masave ndëshkuese të organeve represive, nuk dolën nga qeveritë e koalicionit, përkundrazi, partiçkat tona vazhduan bashkëjetesën sikur të mos kishte ndodhur asgjë.

Filloi konflikti i 2001, si rezultat i pakënaqesisë dhe keqtrajtimit të shqiptarëve ndër vite, por objektivi i kryengritjes për liri dhe barazi u devijua nga komandantët renegatë dhe partiçkat politike kur nenshkruan kapitullimin me MO, e cila sanksionoi gjuhën shqipe si gjuhë e 20%, por që luftëtarëve të lirisë u thanë se fituam she tani duhet dorezuar armët!

Një tjetër përdhosje e dinjitetit shqiptar ishte perdorimi i flamujve të pakicave, që e zvoglonte flamurin shqiptar në raport me atë maqedon 3/1.
Ligji për gjuhët (që në fakt është ligj për gjuhët e pakicave dhe nuk përfshine brenda saj maqedonishten) ishte një kurth tjetër nga ana e partiçkave tona politike duke sajuar një ligj që është inferior për shqiptarët dhe nuk i barabartë me maqedonishten.

Inspektoriati për zbatimin e ligjit për gjuhët është një tallje tjetër e partiçkave tona me shqiptarët, pasi ai inspektoriat nuk ka ndëshkuar asnjë institucion publik që nuk e ka zbatuar përdorimin e gjuhës shqipe, thjesht është zyrë që nuk i shërben shqiptarëve veç djallit që ka brenda.

Pra, tri dekada me radhë partiçkat tona herë në pushtet e herë në opozitë i “dhanë besën” pushtetit se nuk do kërkojnë barazi dhe status të barabartë politik të shqiptarëve me maqedonët, por përkundrazi, do të bëhen vasale të tyre për hir të babëzitjes për para dhe një çik pushtet.

Kështu, telenovela me rrefenja të ndryshme nga partiçkat tona për gjuhën zyrtare shqipe dhe për 20% vazhdon t’i ushqej fantazinë e shqiptarëve se në mandatin e ardhëm do të hiqet nofka e turpit dhe shqiptarët do të jenë element konstituiv dhe të barabartë me maqedonët në Republikën “Severna”!

Përderisa shqiptarët do të besojnë në përrallat e pariçkave tona politike 20% do të ngelet si shpatë e Demokleut mbi kokat e shqiptarëve.

Subjektet tona politike e kanë “dhënë besën” jo në shërbim të qytetarëve shqiptarë që i besojne dhe i votojnë, por për pushtetin dhe shtetin që na trajton si nomadë pa gjuhë dhe pa identitet, si shifra te csktuara.

Përderisa, nuk kemi një subjekt politik të shqiptarëve dhe për shqiptarët, që ka guximin t’i thotë cilitdo komit apo titist të pushtetit se pa barazinë e gjuhës shqipe dhe të barazisë së shqiptarëve në demonkracinë maqedone, nuk garantojmë paterica për “državën” që të ec përpara drejt BE-së.
Fatkeqësisht një subjekt të tillë akoma nuk e kemi!

Medai Shaholli