Goditje diplomatike për Beogradin – Vuçiç nuk ftohet në Forumin Strategjik të Bledit

Presidenti dhe kryeministri serb Aleksandar Vuçiç dhe Đuro Macut nuk u ftuan as në Forumin Strategjik të Bledit, tha Ministria sllovene e Punëve të Jashtme dhe Evropiane për N1 Slovenia.

“Presidenti serb Aleksandar Vuçiç dhe kryeministri Đuro Macut nuk u ftuan në Forumin Strategjik të Bledit. Ministri i Jashtëm serb Marko Đuriç, i cili mori pjesë në Forum, ishte i ftuar”, deklaroi Ministria e Jashtme sllovene në një përgjigje për H1 Slovenia. Siç mësoi jozyrtarisht N1 Slovenia, Presidenti Vuçiç kërkoi të merrte pjesë në forumin në Bled, por nuk mori ftesë.

Në vend të Sllovenisë, Vuçiç udhëtoi për në Kinë, ku mori pjesë në paradën ushtarake që shënonte 80-vjetorin e fitores në Luftën e Dytë Botërore.

Megjithatë, versioni i tij i ngjarjeve është i ndryshëm. Të mërkurën, më 3 shtator, Vuçiç tha nga Pekini se kryeministri Mazut ishte ftuar në Forumin Strategjik, por se ai “me të drejtë nuk shkoi” për shkak të pranisë së “bllokadave”.

Vuçiç tha se “nuk kishte asnjë dilemë” dhe se “nuk donte të merrej me budallallëqe”. “Unë nuk shkova në Bled, Macuti ishte i ftuar. Ai me mençuri dhe korrektësi nuk shkoi. Ata i ftuan bllokuesit në Bled, le të flasin me ta”, theksoi Vuçiç.

Ai shtoi se është e pamundur të krahasohen takimet që mund të kishte pasur në Bled me ato që pati në Kinë. “Nëse krahasoni marrëdhënien dhe bisedën time me Plenkovicin dhe nuk e di se kë tjetër… Dëgjova sa budallallëqe të doni. Nëse e krahasoj me takimet me Xi, Putin dhe Fico, është si të krahasosh Premier League dhe Zonën e Beogradit”, tha Vuçiç, duke iu referuar nivelit të katërt të garave në futbollin serb.

“Ata i ftuan bllokuesit e tyre të vinin në Bled, të ishin mysafirë të tyre atje, t’i pritnin dhe të diskutonin çështje strategjike me ta, sepse bllokuesit do të marrin pushtetin në Serbi brenda pak ditësh – kështu e kam dëgjuar këtë histori për 13, 14 vjet”, u tha Vuçiç gazetarëve në Pekin, duke iu përgjigjur pyetjes nëse do të komentonte mbi akuzat në disa media se bëri një gabim që shkoi në Kinë dhe jo në Forumin Strategjik në Bled.