Detaje të reja për dy vrasjet dhe vetëvrasjen në Veles: Viktima kishte raportuar disa herë dhunë dhe kërcënime nga partneri
Janë zbuluar informacione shtesë për vrasjen e dyfishtë dhe vetëvrasjen në Veles. Viktima disa herë kishte raportuar kërcënime dhe dhunë nga partneri i saj, i cili në mënyrë mizore i vrau me thikë atë dhe babanë e saj, e më pas i dha fund edhe jetës së tij.
Prokuroria Themelore Publike e Velesit sot konfirmoi se ndaj Ilija Stefanovskit, i dyshuar për vrasjen e Rosica Koceva (31) dhe babait të saj Kiro Kocev (68), që nga fillimi i vitit ishin hapur disa procedura për kërcënime dhe dhunë.
Më 10 prill 2025, kundër Stefanovskit ishte ngritur aktakuzë për dy ngjarje:
– Kanosje më 20 shkurt 2025,
– Dhunë me shkaktim lëndimesh të lehta trupore natën mes 3 dhe 4 marsit 2025.
Në kuadër të kësaj procedure u krye një ekspertizë psikiatrike, e cila tregoi se i dyshuari ishte i vetëdijshëm dhe i aftë të kuptonte veprimet e tij – njoftoi Prokuroria.
Më 10 shtator të këtij viti, Gjykata Themelore në Veles e shpalli Stefanovskin fajtor, por i shqiptoi vetëm një dënim me kusht. Njëkohësisht, iu hoqën të gjitha masat e kujdesit, përveç ndalimit për t’iu afruar viktimës dhe partnerit të saj.
Pavarësisht këtyre masave, më 21 maj 2025, Rosica Koceva përsëri e raportoi Stefanovskin. Ajo theksoi se ai nuk i respektonte ndalimet e shqiptuara, vazhdonte t’i dërgonte mesazhe, i afrohej shtëpisë së saj dhe ia kishte djegur makinën babait të saj.
Pas kësaj denoncimi, u dhanë urdhra për sigurimin e të dhënave telefonike dhe pamjeve të kamerave të sigurisë, ndërsa MPB-ja veproi sipas kërkesave të Prokurorisë.
Më 25 mars të këtij viti, viktima paraqiti edhe një denoncim tjetër – kësaj radhe në Prokurorinë Publike në Shkup. Ajo tregoi se më 27 dhjetor 2024, gjatë një udhëtimi nga Bullgaria, Stefanovski ishte përpjekur ta mbante në një banesë dhe i kishte shkaktuar lëndim trupor.
Interesant është fakti se pothuajse në të njëjtën kohë, edhe i dyshuari kishte paraqitur një kallëzim penal kundër Rosicës, duke pretenduar se ajo ngrinte kallëzime të rreme për të nxjerrë para. Por, Prokuroria në Shkup e hodhi poshtë këtë kallëzim dhe vazhdoi të veprojë mbi deklaratat e viktimës.
– Më 9 shtator 2025, viktima dha dëshminë e saj dhe mbeti në qëndrimin për ndjekje penale – konfirmon Prokuroria Publike e Shkupit.
Pavarësisht të gjitha denoncimeve, dënimeve me kusht dhe masave që shpesh u hoqën, dhunuesi vazhdoi ta shqetësonte Rosicën, deri në përfundimin tragjik ku ajo dhe babai i saj u vranë brutalisht.
Drama e përgjakshme ndodhi pasditen e djeshme në Veles, kur Ilija shkoi në shtëpinë familjare të Rosicës, fillimisht e goditi me thikë disa herë atë, më pas edhe babain e saj Kiro, e më pas i dha fund edhe jetës së vet.
– Dy persona, një femër dhe një mashkull, u sollën në Qendrën e Urgjencës të Spitalit të Përgjithshëm të Velesit pas orës 16:00. Fillimisht, mjekët specialistë të kirurgjisë pranuan një grua të therur me thikë në disa vende të trupit dhe u përpoqën ta reanimojnë, por nuk patën sukses.
Më pas u pranua edhe një djalë, por nuk mund t’i jepej ndihmë mjekësore pasi nuk shfaqte shenja jete. Mjekët në të dyja rastet konstatuan vdekjen – deklaroi dr. Vanço Gramatov, zëdhënës i Spitalit të Përgjithshëm të Velesit.