“Qeveria do të marrë masa të rrepta” – Tregtarët, prodhuesit dhe distributorët pasdite në takim tek Durmishi

Ministri i Ekonomisë dhe Punës, Besar Durmishi, sot pasdite do të ketë takim me tregtarët, prodhuesit dhe distributorët ku do të bëhet fjalë për çmimet e produkteve ushqimore. Siç informoi ai, ky do të jetë një paralajmërim i fundit dhe një paralajmërim për ta që të sillen në mënyrë të përshtatshme. Në të kundërtën, paralajmëron ai, “Qeveria do të marrë masa të rrepta”.

“Kërkesa jonë është që të veprojnë në mënyrë adekuate, të mos rrisin çmimet. Ky do të jetë paralajmërimi dhe vërejtja e fundit për ta. Përndryshe, do të marrim masa që do të jenë rigoroze. Nëse sillen si në muajt e kaluar, do të ndërmarrim hapa të duhur, do të marrim vendim të ashpër. Duke i thirrur ata në takim, nënkupton se përgatitemi të ndërmarrim masa”, ka thënë ministri duke u përgjigjur në pyetjen e gazetarëve pas konferencës për shtyp ku ai promovoi shportën shkollore.