Presidenti i Kinës Xi Jinping takon kryeministrin e Indisë Narendra Modi

Të dielën në mesditë, presidenti kinez Xi Jinping u takua në Tianjin me kryeministrin e Indisë Narendra Modi, që ndodhet në Kinë për të marrë pjesë në Samitin e Organizatës së Bashkëpunimit të Shangait (OBSh) 2025.

Gjatë takimit, Xi u shpreh se, si dy vende të lashta lindore dhe me popullsinë më të madhe në botë, Kina dhe India mbajnë përgjegjësinë e rëndësishme për pasurimin e dy popujve, nxitjen e bashkimit dhe rigjallërimit të vendeve në zhvillim dhe të përparimit të bashkësisë njerëzore. Fqinjësia e mirë dhe bashkëpunimi me përfitime të përbashkëta janë zgjedhja e drejtë e të dyja vendeve.

Xi Jinping-u theksoi se Kina dhe India duhet të forcojnë koordinimin strategjik dhe besimin e ndërsjellë, të zgjerojnë shkëmbimet dhe bashkëpunimin me përfitime të përbashkëta, të bashkëjetojnë në harmoni dhe të forcojnë bashkëpunimin në mekanizma shumëpalësh për të mbrojtur interesat e përbashkëta.

Nga ana e tij, kryeministri Modi u shpreh se marrëdhëniet Indi-Kinë janë kthyer në rrugën e zhvillimit pozitiv. Të dy vendet kanë ruajtur paqen e qëndrueshmërinë në zonën kufitare dhe do të rifillojnë fluturimet e drejtëpërdrejta. Këto rezultate jo vetëm u sjellin dy popujve përfitime, por edhe janë në favor të botës. India dhe Kina nuk janë kundërshtare, por partnere, dhe mendimet e përbashkëta të tyre janë më të shumta se mosmarrëveshjet. Përballë paqartësive të ekonomisë botërore, si dy ekonomi të rëndësishme globale, forcimi i bashkëpunimit midis Indisë dhe Kinës ka rëndësi të madhe. India është e gatshme të punojë me Kinën për të kërkuar një projekt të barabartë, të arsyeshëm e të pranueshëm për zgjidhjen e problemit të kufirit.