Merz: Po përgatitem që lufta në Ukrainë të zgjasë shumë

Kancelari gjerman Friedrich Merz tha sot se po përgatitet që lufta në Ukrainë të zgjasë shumë, pasi luftërat zakonisht përfundojnë me disfatë ushtarake ose kolaps ekonomik, dhe ai nuk sheh skenarë të tillë në horizont as për Kievin dhe as për Moskën, raportoi Reuters .

Deklaratat e Merz erdhën një ditë para afatit të caktuar nga Presidenti i SHBA-së, Donald Trump, për një takim midis presidentëve të Rusisë dhe Ukrainës që synonte hapjen e rrugës për bisedime paqeje. Trump kërcënoi me “pasoja” nëse takimi nuk do të zhvillohej.

“Brenda meje po përgatitem që kjo luftë të zgjasë shumë”
Merz dhe Presidenti francez Emmanuel Macron thanë se faji i takon Presidentit rus Vladimir Putin dhe i bënë thirrje SHBA-së të vendosë sanksione më të ashpra ndaj Moskës.

“Brenda vetes, po përgatitem për faktin se kjo luftë do të zgjasë shumë”, tha Merz në një intervistë me televizionin shtetëror ZDF. Po bëhen përpjekje përmes iniciativave intensive diplomatike për t’i dhënë fund luftës sa më shpejt të jetë e mundur, por kjo nuk duhet të jetë “me koston e kapitullimit të Ukrainës”, sepse atëherë Rusia thjesht do të sulmonte një vend tjetër, tha ai. “Dhe nesër do të jemi ne”, shtoi Merz. “Kjo nuk është një mundësi”.

Refuzoi të komentojë mbi mundësinë e dërgimit të forcave gjermane në Ukrainë
Në intervistë, ai refuzoi të shprehte mendimin e tij mbi vendosjen e mundshme të forcave gjermane në Ukrainë, si pjesë e garancive të sigurisë në rast të një marrëveshjeje paqeje.

Britania dhe Franca po udhëheqin një propozim për një forcë paqeruajtëse për të penguar agresionin e mundshëm rus në të ardhmen në këtë kontekst, por mundësia e bashkimit të Gjermanisë ka shkaktuar shqetësim në një vend që ende shënohet nga e kaluara e tij naziste.

Kremlini tha sot se fuqitë evropiane po pengojnë përpjekjet e Trump për paqe dhe se Rusia do të vazhdojë operacionin e saj në Ukrainë derisa Moska të shohë shenja reale se Kievi është gati për paqe.