Erdogan: Industria e mbrojtjes turke po shkruan histori

Presidenti turk Recep Tayyip Erdogan ka vlerësuar industrinë turke të mbrojtjes si një burim krenarie kombëtare, gjatë hapjes së edicionit detar të festivalit të teknologjisë TEKNOFEST, i quajtur “Atdheu Blu”.

Eventi po mbahet në Komandën e Kantierit Detar të Stambollit dhe do të zgjasë katër ditë. Ndërkohë që festivali ka filluar sot, pjesëmarrja e publikut do të jetë e hapur nga data 29 deri më 31 gusht.

Në fjalimin e tij, Erdogan theksoi se “industria e mbrojtjes e Turqisë, e cila është një burim krenarie, po shkruan histori”, duke shtuar se përparimi në këtë fushë ka bërë që Turqia të admirohet ndërkombëtarisht.

“Ndërsa miqtë e Turqisë i lavdërojnë arritjet e saj, kundërshtarët e vendit po përpiqen me padurim ta arrijnë atë”, deklaroi presidenti.

Ai e krahasoi zhvillimin aktual të teknologjisë me luftën historike për pavarësi, duke thënë: “Ashtu si lufta e vendit për pavarësi u dha shpresë të shtypurve 100 vjet më parë, iniciativat e sotme të industrisë së mbrojtjes po u japin kurajë të shtypurve”.

“Kudo që ka një vëlla ose motër që vuan nga vështirësitë, nga Palestina në Siri, nga Jemeni në Somali, nga Sudani në Libi, ata krenohen me arritjet e Turqisë”, tha ai më tej.

Erdogan nënvizoi se vendi ka arritur një nivel që “bota e ka zili” në një periudhë të shkurtër kohore. Ai po ashtu vuri në pah se përveç forcimit të industrisë së mbrojtjes, Turqia po përpiqet të rrisë interesin e brezit të ri për teknologjinë, digjitalizimin dhe inovacionin.

“Vizitorët do të jenë në gjendje të shohin se sa larg ka përparuar teknologjia detare turke,” përfundoi Erdogan.