Bajram Rexhepi nga Veshalla: Malësia e Sharrit është lënë në harresë totale nga Komuna e Tetovës

Kandidati për kryetar të Komunës së Tetovës nga Aleanca për Kombëtarizëm dhe Integrim (AKI), Bajram Rexhepi, ka vijuar takimet me qytetarët në kuadër të fushatës. Pas Bozofcës ai qëndroi në fshatin Veshallë, një tjetër vendbanim i Malësisë së Sharrit, i cili, siç u theksua gjatë takimit, është lënë në harresë të plotë nga autoritetet komunale.

“Mungesa e planit urbanistik u ka pamundësuar banorëve edhe të drejtat më elementare, përfshirë aplikimin për subvencione shtetërore, për shkak se pronat nuk janë të definuara në asnjë planifikim hapësinor,” deklaroi Rexhepi pas takimit.

Një tjetër shqetësim madhor për banorët është infrastruktura rrugore, e cila mbetet në gjendje të mjerueshme, duke vështirësuar ndjeshëm qarkullimin – veçanërisht gjatë sezonit të dimrit.

“Erdhëm për të dëgjuar, sepse zëri i banorëve është themeli i programit tonë. Bashkë do të sjellim zgjidhje reale dhe të arritshme për Veshallën dhe për të gjithë Malësinë,” u shpreh kandidati i AKI-së.