Anija që transporton ndihma dhe aktivistë niset drejt Gazës ‘për të thyer rrethimin izraelit’

Një anije që transporton ndihma humanitare dhe aktivistë, përfshirë aktivisten e famshme suedeze Greta Thunberg, do të niset nga Barcelona sot, për të provuar, thanë organizatorët, të “thyejë rrethimin e paligjshëm të Gazës”.

Një numër i paspecifikuar anijesh do të nisen nga Barcelona dhe dhjetëra anije të tjera pritet të nisen nga porte të tjera mesdhetare dhe tuniziane më 4 shtator.

Anijet do të nisen nga qyteti port spanjoll për të “hapur një korridor humanitar dhe për t’i dhënë fund gjenocidit kundër popullit palestinez”, siç thotë Global Sumud Fleet, por nuk dihet saktë koha e nisjes dhe numri i anijeve.

Flota pritet të mbërrijë në enklavën bregdetare të shkatërruar nga lufta në mesin e shtatorit, shkruajnë mediat e huaja.

“Ky do të jetë misioni më i madh i solidaritetit në histori, me më shumë njerëz dhe më shumë anije sesa të gjitha përpjekjet e mëparshme të kombinuara”, tha aktivisti brazilian Thiago Avila.

Aktivistët do të organizojnë njëkohësisht protesta në 44 vende “në solidaritet me popullin palestinez”, njoftoi Thunberg.

Përveç Thunberg, flota do të përfshijë aktivistë nga disa vende, ligjvënës evropianë dhe figura publike si ish-kryetarja e bashkisë së Barcelonës, Ada Colau.

Ndryshe, Izraeli tashmë ka bllokuar dy përpjekje të aktivistëve për të dërguar ndihmë në Gaza me anije, në qershor dhe korrik.

Në qershor, forcat izraelite ndaluan 12 aktivistë në anijen me vela Madleen 185 km në perëndim të Gazës.

Pasagjerët, përfshirë Thunberg, u ndaluan dhe përfundimisht u deportuan.

Në korrik, 21 aktivistë nga 10 vende u ndaluan ndërsa përpiqeshin të arrinin në Gaza me një anije tjetër, Handala.