Të paktën 28 palestinezë të vrarë nga sulmet izraelite në Rripin e Gazës

Të paktën 28 palestinezë, përfshirë katër fëmijë, janë vrarë të shtunën nga sulmet ajrore izraelite në Rripin e Gazës, ka raportuar Associated Press.

Katër fëmijë dhe dy gra ishin në mesin e 13 personave të vrarë në Deir al-Balah, në pjesën qendrore të Gazës, pasi zona u godit nga sulme të rënda ajrore që nisën të premten në mbrëmje, sipas zyrtarëve shëndetësorë të Spitalit të Martirëve Al-Aqsa

Katër persona të tjerë u vranë pranë një stacioni të karburantit, teksa 15 të tjerë humbën jetën nga sulmet në Khan Younis, në jug të Gazës, bazuar në njoftimin e Spitalit Nasser.

Ushtria izraelite ka bërë të ditur se gjatë 48 orëve të fundit, trupat e saj kanë goditur rreth 250 objektiva në Rripin e Gazës, përfshirë militantë, depo armësh, pozicione për lëshimin e raketave antitank, poste snajperësh, tunele dhe infrastrukturë tjetër të Hamasit.

Mes tjerash, Organizata e Kombeve të Bashkuara (OKB) ka njoftuar të shtunën se mungesa e karburantit në enklavën palestineze ka arritur në nivele kritike.

Në njoftim thuhet gjithashtu se furnizimi me karburant është i domosdoshëm për të transportuar mallra thelbësore në të gjithë Rripin e Gazës dhe për të mbajtur në funksion rrjetin e furrave të bukës që sigurojnë ushqim për popullatën e uritur.

Sipas OKB-së, mungesa e karburantit nënkupton se “burimet jetike do të zhduken për 2.1 milionë njerëz”, të cilët, “po qëndrojnë në prag të urisë së skajshme”.