Pas Britanisë dhe Francës, edhe Kanadaja njofton njohjen e shtetit palestinez

Kryeministri Mark Carney njoftoi se Kanada planifikon ta njohë shtetin palestinez në shtator, duke ndjekur shembullin e Francës dhe Mbretërisë së Bashkuar. Ai tha se ky hap varet nga reformat demokratike, përfshirë mbajtjen e zgjedhjeve pa përfshirjen e Hamasit.

Një ditë më parë, Mbretëria e Bashkuar kishte paralajmëruar se do ta njihte shtetin palestinez në shtator, nëse Izraeli nuk pranon një armëpushim dhe kushte të tjera.

Ministria e Jashtme izraelite e hodhi poshtë njoftimin e Kanadasë, duke e përshkruar atë si një shpërblim për Hamasin.

Carney tha se Kanada do ta njohë zyrtarisht Palestinën në Asamblenë e Përgjithshme të OKB-së që do të mbahet së shpejti. Ai përmendi zgjerimin e vendbanimeve izraelite në Bregun Perëndimor të pushtuar, përkeqësimin e situatës humanitare në Gaza dhe sulmet e Hamasit ndaj Izraelit më 7 tetor 2023 si arsye për ndryshimin dramatik të politikës së jashtme të Kanadasë.

“Niveli i vuajtjes njerëzore në Gaza është i padurueshëm dhe po përkeqësohet me shpejtësi. Kanadaja ka qenë prej kohësh e përkushtuar ndaj zgjidhjes me dy shtete si pjesë e një procesi paqeje, por ky qasje nuk është më e qëndrueshme. Perspektiva për një shtet palestinez po shkatërrohet para syve tanë”, deklaroi Carney.

Nga 193 shtete anëtare të Kombeve të Bashkuara, 147 e kanë njohur shtetin palestinez. Nëse Franca dhe Mbretëria e Bashkuar e bëjnë këtë zyrtarisht, Shtetet e Bashkuara do të mbeten e vetmja anëtare e përhershme e Këshillit të Sigurimit të OKB-së që nuk e ka njohur Palestinën.