Netanyahu kritikon Starmer: Njohja e shtetit palestinez shpërblen Hamasin dhe ndëshkon viktimat e tij

Kryeministri izraelit, Benjamin Netanyahu kritikoi ashpër homologun e tij britanik për planin për të njohur një shtet palestinez, duke pretenduar se “Starmer po shpërblen terrorizmin monstruoz të Hamasit dhe po ndëshkon viktimat e tij”.

“Një shtet xhihadist në kufijtë e Izraelit SOT, do të kërcënojë Britaninë NESËR”, shkroi ministri izraelit në X.

Netanyahu thotë se politika e paqësimit kundër terroristëve xhihadistë ka dështuar, duke sugjeruar se edhe plani britanik është i destinuar të dështojë.

Të martën, kryeministri britanik, Keir Starmer u paraqiti ministrave të tij një plan gjithëpërfshirës paqeje për Gazën, i cili, ndër të tjera, përcakton se nëse Izraeli nuk bie dakord për një armëpushim, Mbretëria e Bashkuar do të njohë një shtet palestinez në Asamblenë e Përgjithshme të OKB-së në shtator.

Plani thuhet gjithashtu se përfshin një rritje të menjëhershme të ndihmës humanitare, përjashtimin e Hamasit nga çdo formë qeverisjeje dhe mbështetje praktike për një marrëveshje paqeje të garantuar ndërkombëtarisht.

Të enjten e kaluar, presidenti francez Emmanuel Macron njoftoi se vendi i tij do ta njihte shtetin e Palestinës në Asamblenë e Përgjithshme të OKB-së në shtator. Duke njohur një shtet palestinez, Franca synon të “kontribuojë në mënyrë vendimtare në paqen në Lindjen e Mesme” dhe “do të mobilizojë të gjithë partnerët e saj ndërkombëtarë që dëshirojnë të marrin pjesë” në këtë përpjekje, shkroi Macron në një letër drejtuar presidentit të Autoritetit Palestinez, Mahmoud Abbas.