Komisioni Evropian: Nuk ka raportime për vjedhje ndihmash nga Hamasi në Gaza

Komisioni Evropian të hënën tha se nuk ka prova që Hamasi po vjedh ndihmën humanitare në Gaza dhe e përshkroi situatën humanitare në enklavë si “katastrofike”.

Duke folur në konferencë për media zëdhënësja e KE-së Eva Hrncirova iu përgjigj një pyetjeje në lidhje me akuzat se grupi palestinez po devijon ndihmën e destinuar për civilët.

“Nuk kemi asnjë raport për vjedhje ndihmash nga Hamasi”, tha ajo, duke theksuar angazhimin e BE-së ndaj parimeve humanitare të pavarura dhe neutrale.

“Padyshim, ne nuk e fshehim se situata në Gaza është katastrofike dhe shumë, shumë komplekse”, shtoi Hrncirova.

“Megjithatë, ne kemi një sistem që është në vend. Ne kemi një infrastrukturë se si të ofrojmë ndihmë në Gaza dhe ky është një sistem që duhet të përdoret menjëherë për t’i ndihmuar njerëzit në Gaza që janë të uritur”, tha zëdhënësja e KE-së.

Hrncirova nënvizoi se BE-ja vazhdon të mbështetet në organizatat humanitare ndërkombëtare të themeluara për të ofruar ndihmë.

“Ne nuk bashkëpunojmë me Fondacionin Humanitar Global sepse mendojmë se ndihma humanitare nuk mund të privatizohet, politizohet ose të bëhet mjet konflikti”, shtoi ajo.

Komisioni Evropian vazhdon t’u bëjë thirrje autoriteteve izraelite që t’u japin qasje partnerëve të saj të ndihmës në Gaza.

Fondacioni Humanitar i Gazës është një mekanizëm shumë i diskutueshëm amerikan i mbështetur nga Izraeli që vepron në Gaza që nga 27 maji, ku qindra palestinezë që kërkojnë ndihmë janë vrarë në ose pranë vendeve të shpërndarjes së ndihmës nga ushtria izraelite në dy muaj, sipas zyrtarëve të OKB-së.

Agjencia e OKB-së për refugjatët palestinezë (UNRWA) dhe mbi 170 OJQ, përfshirë Oxfam, Amnesty International dhe Mjekët pa Kufij (MSF), nënshkruan një deklaratë të përbashkët që bën thirrje për t’i dhënë fund “skemës vdekjeprurëse izraelite të shpërndarjes, përfshirë të ashtuquajturin Fondacion Humanitar i Gazës”, dhe një kthim në mekanizmat e koordinimit të udhëhequr nga OKB-ja.

Izraeli ka vrarë më shumë se 57.000 palestinezë, shumica prej tyre gra dhe fëmijë, në Gaza që nga tetori i vitit 2023. Bombardimet e pamëshirshme kanë shkatërruar enklavën dhe kanë krijuar kushte të ngjashme me urinë.