Trump-Putin, një orë telefonatë! Çfarë u diskutua mes dy presidentëve për tensionet Izrael-Iran

Presidenti i SHBA-së, Donald Trump, dhe presidenti rus, Vladimir Putin, kanë diskutuar tensionet aktuale midis Iranit dhe Izraelit në një telefonatë 50-minutëshe këtë mëngjes, njofton Shtëpia e Bardhë.

Presidenti rus Vladimir Putin ka dënuar operacionin ushtarak të Izraelit ndaj Iranit gjatë bisedës me Trump, sipas këshilltarit të tij për politikën e jashtme, Yuri Ushakov.

Deklarata e Putinit nuk përbën surprizë. Një ditë më parë, një zëdhënës i Kremlinit kishte shprehur shqetësim për “përshkallëzimin e tensioneve” në Lindjen e Mesme, duke theksuar rrezikun e destabilizimit të mëtejshëm në rajon.

Megjithatë, Moska po përpiqet të shmangë mundësinë që kjo krizë të ndikojë negativisht në përpjekjet e saj për të përmirësuar marrëdhëniet me Uashingtonin. Edhe pse Trump kishte deklaruar se ai dhe ekipi i tij ishin në dijeni për sulmet izraelite, Kremlini nuk ka shprehur asnjë kritikë publike ndaj Shteteve të Bashkuara.

Sipas Kremlinit, të dy liderët shprehën “kënaqësi” për marrëdhënien personale mes tyre, një sinjal pozitiv për Moskën.

Rusia llogarit se ruajtja e marrëdhënieve të ngrohta me administratën Trump, e kombinuar me ofertën e saj për të ndërmjetësuar në Lindjen e Mesme, mund ta bëjë gjithnjë e më të pamundur që SHBA të shtojë presionin ndaj Moskës për luftën në Ukrainë.