Perinski në Gazi Babë: Zhvillimi i komunave dhe përmirësimi i cilësisë së jetës së të gjithë qytetarëve është prioriteti ynë
Ministri për vetëqeverisje lokale, Zllatko Perinski, së bashku me kryetarin e komunës së Gazi Babës, Boban Stefkovski, sot inspektuan punimet ndërtimore për ndërtimin e kanalizimit fekal vakum në Jurumleri, zona 1 dhe zona 2, me një gjatësi totale prej 4071 metrash, dhe paralajmëruan fazën e dytë të realizimit të projektit. Për këtë fazë, komuna ka aplikuar në thirrjen e dytë të qeverisë për mbështetje të projekteve infrastrukturore komunale, vlera totale e të cilit është pothuajse 150 milionë denarë, nga të cilat rreth 145 milionë denarë kërkohen nga Ministria për Mjedis Jetësor dhe Planifikim Hapësinor, ndërsa pjesa tjetër bashkëfinancohet nga komuna.
Kryetari Stefkovski theksoi se bëhet fjalë për një projekt veçanërisht të rëndësishëm për Jurumlerin dhe se përveç rrjetit të ri të kanalizimit, do të ndërtohen edhe 189 lidhje individuale për amvisëritë, gjë që do ta përmirësojë ndjeshëm jetën e qytetarëve, si dhe cilësinë e mjedisit jetësor dhe higjienës publike. Ai shtoi se për fazën e fundit të këtij projekti kanë aplikuar për mjete në thirrjen e dytë qeveritare për mbështetje të projekteve infrastrukturore komunale, dhe me realizimin e saj, i gjithë vendbanimi do të ketë rrjet kanalizimi me stacion për pastrimin e ujërave të zeza.
“Qeveria po tregon një marrëdhënie të vërtetë partneriteti ndaj qytetarëve. Mbështetja që po marrim është një shtytës për realizimin e projekteve që janë me rëndësi thelbësore për zhvillimin lokal”, theksoi kryetari.
Sipas ministrit Perinski, ky projekt është edhe një dëshmi e përkushtimit të përhershëm të komunës në drejtim të investimeve dhe arritjes së zhvillimit të barabartë në të gjithë territorin e Gazi Babës, gjë që për qeverinë është imperative.
“Bëhet fjalë për një projekt historik. Faza e parë është financuar tërësisht nga buxheti i komunës, ndërsa për fazën e dytë dhe realizimin e plotë, ne si pushtet qendror do të ndajmë afërsisht 150 milionë denarë. Jam me të vërtetë krenar, sepse në total për këtë projekt do të ndahen rreth 3.5 milionë euro dhe do të zgjidhet një problem që zgjat prej dekadash”, deklaroi ministri, i cili shtoi se pushteti qendror përmes dy thirrjeve publike mbështet komunat me rreth 20 miliardë denarë. Në drejtim të zhvillimit lokal, theksoi Perinski, Ministria për Vetëqeverisje Lokale, përmes Programit për Uljen e Dispariteteve, ka nënshkruar 38 kontrata të reja për projekte të reja në vlerë prej rreth 88 milionë denarë, ndërsa javën e kaluar, në seancën e Këshillit për Zhvillim të Balancuar Rajonal, u miratua një vendim i propozuar për mbështetjen e 47 projekteve, për të cilat do të ndahen 116 milionë denarë, të cilat do të realizohen në të gjitha rajonet e vendit.
“Ne si Qeveri, jo vetëm që vazhdojmë në mënyrë të vazhdueshme të mbështesim të gjitha komunat në Maqedoni, por këtë edhe po e intensifikojmë. Ajo që thashë më parë është një dëshmi për këtë dhe jam i bindur se për një kohë shumë të shkurtër do t’i përmirësojmë kushtet dhe do ta rrisim cilësinë e jetës për të gjithë qytetarët në të gjitha komunat e Maqedonisë”, theksoi ministri.
