Përdorimi i marijuanës rrit ndjeshëm rrezikun për vdekje nga infarkti dhe goditja në tru

Përdorimi i marijuanës rrit ndjeshëm rrezikun për të vdekur nga infarkti dhe ishemia cerebrale, tregon një studim i madh

Përdorimi i marijuanës e dyfishon rrezikun për të vdekur nga sëmundjet kardiovaskulare, sipas një analize të re të dhënave mjekësore që përfshijnë 200 milionë persona, kryesisht në moshat 19 deri në 59 vjeç.

“Ajo që ishte veçanërisht shqetësuese ishte se pacientët e prekur nga këto çrregullime ishin të rinj (dhe për këtë arsye jo të prirë të kishin probleme të tilla për shkak të duhanpirjes) dhe pa histori të mëparshme të sëmundjeve kardiovaskulare ose faktorëve të rrezikut,” tha autorja kryesore Émilie Jouanjus, pedagoge e asociuar e farmakologjisë në Universitetin e Toulouse, Francë.

Krahasuar me personat që nuk përdorin kanabis, ata që e përdorin kishin një rrezik 29% më të lartë për infarkt dhe 20% më të lartë për ishemi cerebrale (goditje në tru), sipas studimit të publikuar të martën në revistën Heart.

“Ky është një nga studimet më të mëdha deri më tani që lidhen me marrëdhënien mes marijuanës dhe sëmundjeve të zemrës, dhe vë në pikëpyetje serioze idenë se kanabisi ka pak ose aspak rrezik për shëndetin kardiovaskular,” tha Dr. Lynn Silver, pediatre dhe profesore klinike e epidemiologjisë dhe biostatistikës në Universitetin e Kalifornisë, San Francisko.

“Për të kuptuar saktë këtë çështje, është jetike sepse sëmundjet kardiovaskulare janë shkaku kryesor i vdekjeve si në SHBA ashtu edhe globalisht,” shtoi ajo. Silver është gjithashtu këshilltare e lartë në Institutin e Shëndetit Publik, një organizatë jofitimprurëse që analizon politikat mbi marijuanën dhe legalizimin e saj. Ajo është bashkautore e një editoriali të publikuar bashkë me studimin, që bën thirrje për një ndryshim në mënyrën si e shohin marijuanën profesionistët e shëndetit, rregullatorët dhe publiku në përgjithësi.

“Mjekët duhet të pyesin pacientët për përdorimin e kanabisit dhe t’i informojnë për rreziqet, ashtu siç bëjmë për duhanin – sepse në disa grupe të popullsisë, ai po përdoret më shumë sesa vetë duhani,” shtoi ajo. “Sistemi ynë rregullator, që ka qenë kryesisht i fokusuar në krijimin e një infrastrukture ligjore për bizneset fitimprurëse të kanabisit, duhet të fokusohet shumë më tepër në paralajmërimet për shëndetin dhe edukimin mbi rreziqet reale.”

Rreziqet nga tymi i kanabisit (dhe ndoshta edhe ushqimet)

Analiza e re sistematike dhe meta-analiza shqyrtoi të dhëna nga studime të mëdha observuese të kryera në Australi, Egjipt, Kanada, Francë, Suedi dhe SHBA midis viteve 2016 dhe 2023.

Studimet nuk e përcaktonin se si e kishin përdorur njerëzit kanabisin për shembull nëse e kishin tymosur, thithur me vaporizator, përmes koncentratesh (dabbing), ushqimesh, tretësirash apo përbërjesh për lëkurën. Megjithatë, “bazuar në të dhëna epidemiologjike, me shumë gjasë kanabisi është tymosur në shumicën dërrmuese të rasteve,” tha Jouanjus.

Tymosja e duhanit është një shkak i njohur i sëmundjeve të zemrës si nga tymi, ashtu edhe nga kimikatet që dëmtojnë enët e gjakut dhe rrisin koagulimin, sipas Qendrave për Kontrollin dhe Parandalimin e Sëmundjeve në SHBA (CDC).

Prandaj nuk është për t’u habitur që edhe tymosja, thithja me vaporizator ose dabbing e kanabisit mund të ketë efekte të ngjashme, tha Silver: “Çdo mënyrë e thithjes së kanabisit përmes ajrit ka rreziqe për përdoruesin –dhe gjithashtu ekziston rreziku i ekspozimit pasiv, i ngjashëm me atë të duhanit.”

Ideja se tymosja e kanabisit është më e sigurt sepse është “natyrale” është e gabuar, tha Dr. Beth Cohen, profesore e mjekësisë në Universitetin e Kalifornisë, San Francisko, për CNN.

“Kur digjet diçka, qoftë duhan apo kanabis, krijohen përbërje toksike, kancerogjene dhe grimca të dëmshme për shëndetin,” tha ajo.

Edhe përdorimi i ushqimeve të përziera me THC (tetrahidrokanabinol) ka treguar efekte të dëmshme në sistemin kardiovaskular, të krahasueshme me ato të tymosjes së duhanit.

“Gjetëm se funksioni vaskular ulet me 42% te përdoruesit e marijuanës dhe me 56% te ata që konsumojnë THC përmes ushqimeve, krahasuar me personat që nuk përdorin fare,” tha Dr. Leila Mohammadi, kërkuese asistente në kardiologji në Universitetin e Kalifornisë, San Francisko.

Rreziku nga kanabisi me përqendrim të lartë THC

Asnjë nga studimet e përfshira në këtë meta-analizë nuk e mat përqendrimin e THC-së në produktet e përdorura. Edhe sikur ta kishin bërë, tha Silver, kjo do të ishte informacion i përkohshëm: “Tregu i kanabisit po ndryshon çdo ditë. Po bëhet gjithnjë e më i fuqishëm.”

“Produktet që shiten sot në Kaliforni janë deri në 510 herë më të forta se ato që përdorej në vitet 1970. Koncentratet mund të jenë 99% THC të pastër. Vaporizatorët shpesh përmbajnë mbi 80% THC.”

“Një sërë kanabinoidësh të përftuar kimikisht janë thuajse tërësisht THC, dhe këto kanë efekte shumë të ndryshme krahasuar me një cigare kanabisi të përdorur në vitet ’70.”

Kanabisi me përqendrim të lartë po ndikon edhe në rritjen e varësisë një studim i publikuar në korrik 2022 tregoi se përdorimi i marijuanës me përqendrim të lartë ishte i lidhur me një rrezik katërfish më të lartë për zhvillimin e varësisë.

Në SHBA, rreth 3 në 10 përdorues të marijuanës vuajnë nga çrregullimi i përdorimit të kanabisit termi mjekësor për varësinë ndaj marijuanës, sipas CDC-së.

“E dimë se kanabisi me përqendrim të lartë rrit gjasat për t’u bërë i varur,” tha Silver. “E dimë gjithashtu që rrit rrezikun për psikozë, halucinacione ose skizofreni. Përdoruesit kronikë gjithashtu mund të përjetojnë të vjella të pakontrollueshme.”

Kjo rritje në përqendrimin e THC-së është një nga arsyet pse studimi aktual mund të mos e ketë pasqyruar plotësisht rrezikun që paraqet kanabisi për zemrën, tha Jouanjus: “Dyshojmë se lidhja mund të jetë edhe më e fortë sesa ajo që u raportua.”

Ndërkohë që shkenca vazhdon të hetojë rreziqet, ekspertët thonë se është koha për të reflektuar seriozisht mbi pasojat e përdorimit të kanabisit veçanërisht për personat me rrezik për sëmundje të zemrës.

“Nëse do të isha një person 60-vjeçar me ndonjë rrezik për sëmundje kardiovaskulare, do të isha shumë i kujdesshëm me përdorimin e kanabisit,” tha Silver