Mbappe në dyshim për sfidën e parë në Botërorin e Klubeve

Ylli i Real Madridit, Kylian Mbappé, është në dyshim për ndeshjen e parë të skuadrës së tij në Kupën e Botës për Klube ndaj Al Hilal të Arabisë Saudite, që zhvillohet sonte nga ora 21:00. Sulmuesi francez mungoi në seancën stërvitore të së martës për shkak të etheve.

Klubi madrilen bëri të ditur se do të merret një vendim për pjesëmarrjen e tij në mëngjesin e ditës së ndeshjes. Trajneri i sapoemëruar, Xabi Alonso, i cili do të debutojë në stolin e Realit në këtë përballje, tha në konferencën për shtyp se lojtari nuk është në formën optimale, përcjellë KosovaPress.

“Kylian ishte pak më mirë këtë mëngjes, por nuk ishte ende në formë optimale, ndaj vendosëm të mos e ngarkojmë me stërvitje. Do të shohim si do të ndjehet orëve në vazhdim dhe do të marrim një vendim në momentet e fundit.”

Mungesa e mundshme e Mbappé-së përbën një sfidë për Alonson, pasi ai është aktualisht sulmuesi i vetëm i mirëfilltë në skuadër. Alternativa tjetër në sulm, adoleshenti brazilian Endrick, është jashtë fushave për shkak të një lëndimi muskulor të pësuar muajin e kaluar në ndeshjen ndaj Sevillas në La Liga.

Mbappé ka qenë vendimtar për Realin që nga transferimi i tij verën e kaluar nga Paris Saint-Germain, duke shënuar 31 gola në kampionat dhe duke udhëhequr sulmin me efikasitet.

Megjithatë, Alonso u shfaq i qetë dhe u shpreh se skuadra duhet të funksionojë si një e tërë:

“Presioni dhe puna mbrojtëse janë thelbësore. Kjo është një prej detyrave tona më urgjente dhe do të jetë vendimtare edhe në të ardhmen për suksesin e Real Madridit.”

Real Madridi hyn në këtë turne si një ndër favoritët kryesorë, falë dominimit të tij në futbollin evropian – me pesë tituj të Ligës së Kampionëve të fituar në dhjetë vitet e fundit.

Kundërshtari i parë, Al Hilal, është fituesi i Ligës së Kampionëve të Azisë në vitin 2021 dhe do të kërkojë të shfrytëzojë çdo boshllëk në formacionin e kampionëve evropianë.

Të dy skuadrat ndodhen në Grupin F, së bashku me Pachuca-n nga Meksika dhe RB Salzburg nga Austria.