Kimikatet e dëmshme shpeshherë kalojnë te ushqimet e konservuara. Si t’i shmangim.

Konservat janë të përhapura në çdo shtëpi, të dobishme për njerëzit e zënë, studentët, apo në raste emergjente. Ato ruajnë ushqimin për periudha të gjata, por siguria e tyre kërkon vëmendje më të hollësishme ndaj ndërveprimeve kimike mes përmbajtjes dhe ambalazhit.

Shumë njerëz shmangin konservat e dëmtuara me arsye, pasi dëmtimet mund të lejojnë depërtimin e baktereve. Por, rreziku më pak i dukshëm lidhet me përbërësit e brendshëm të kanaçeve. Shumë kanaçe janë të veshura me përbërje polimerike që veprojnë si mbrojtje ndaj korrozionit dhe ruajnë cilësinë e ushqimit. Megjithatë, disa substanca nga këto veshje mund të migrojnë në ushqim dhe, me kalimin e kohës, të paraqesin rrezik për shëndetin.

Studimet në Universitetin e Santiago de Compostela zbuluan se shumë prej këtyre veshjeve përmbanin rrëshira epokside nga bisfenoli A (BPA), një ndërprerës hormonal i lidhur me sëmundje metabolike, infertilitet dhe efekte të tjera të dëmshme. Megjithëse përdorimi i BPA është ndaluar në shishet për foshnje që prej 2011, dhe së fundmi në të gjitha materialet që kanë kontakt me ushqimin në BE, substanca të ngjashme si “cyclo-di-BADGE” vazhdojnë të gjenden, veçanërisht në konserva me vaj, marinadë apo salcë domateje.

Rreziku rritet kur ushqimi nxehet brenda kanaçes, praktikë e zakonshme në kamping, sepse nxehtësia përshpejton kalimin e këtyre kimikateve në ushqim. Gjithashtu, përdorimi i lëngjeve nga konservat për sallata apo makarona mund të rrisë ekspozimin.

Studimet tregojnë se trupi përthith më shumë nga këto substanca kur ato konsumohen me yndyrna. Bioaksesueshmëria, sasia që trupi mund të thithë, është më e lartë te fëmijët dhe të moshuarit për shkak të pH më pak acidik në stomak.

Edhe pse shumica e niveleve janë brenda kufijve të lejuar, ekspozimi i përsëritur nëpërmjet ushqimit, ujit apo kontaktit me lëkurën mund të grumbullohet në organizëm dhe të shkaktojë efekte negative afatgjata, veçanërisht tek grupet më të ndjeshme.

Marrja e masave të vogla si shmangia e ngrohjes së kanaçeve dhe mos-përdorimi i vajit nga to mund të ndihmojë në uljen e rrezikut dhe një dietë më të shëndetshme. / The Conversation – Syri.net